«ՀՀ-ում ժողովրդավարությունն ապահովելու համար կարեւոր է ձայնը տալ «Լույս» դաշինքին: Ժողովրդավարություն՝ նշանակում է ազատ խոսքի իրավունք, հավասար հնարավորություններ, քաղաքական մրցակցություն»,-«Լույս» դաշինքի նախընտրական հավաքում այսօր հայտարարեց դաշինքի առաջնորդներից ԱԺ «Ելք» խմբակցության պատգամավոր Էդմոն Մարուքյանը: Հիշեցնենք, որ սեպտեմբերի 23-ին կայանալիք Երեւանի ավագանու ընտրություններին «Հանրապետություն» եւ «Լուսավոր Հայաստան» կուսակցությունները մասնակցում են «Լույս» դաշինքով. քաղաքապետի թեկնածուն է Արդարադատության գործող նախարար Արտակ Զեյնալյանը:
Էդմոն Մարուքյանն անդրադարձավ սոցիոլոգիական տարբեր հարցումների արդյունքներին եւ ընտրողներին կոչ հղեց. «Չխաբնվեք ոչ մի հարցման տվյալներով: Երկու կարեւոր բան հիշեցնեմ: Երբ Մեծ Բրիտանիայում հանրաքվեի էր դրվել ԵՄ-ի կազմից դուրս գալու հարցը, հարցումների արդյունքներն ասում էին՝ «անհնար է նման բան», բայց բնակչությունը քվեարկեց ԵՄ-ից դուրս գալու օգտին: Մեկ այլ օրինակ. բոլոր հարցումների տվյալներով՝ Հիլարի Քլինթոնը հաղթելու էր, բայց ԱՄՆ նախագահ ընտրվեց Դոնալդ Թրամփը»:
Ըստ Էդմոն Մարուքյանի՝ իրենց հանդիպումները բնակիչների հետ այլ բան են ասում, քան սոցհարցումների արդյունքները. «Վարչապետը երեկ շատ լավ բան ասեց, որ ոչ մի պայմանավորվածություն չկա: Այո, այդպես է, չկա ոչ մի պայմանավորվածություն, եւ երեւանցիները իրենք են որոշելու, թե ով է քաղաքապետը»:
Լուիզա ՍՈՒՔԻԱՍՅԱՆ
