«Իշխող կուսակցության թեկնածուն իրեն պահեց Տարոն Մարգարյանի նման`բարուրային պայմաններում`ոչ հարցազրույց, ոչ ուղիղ եթեր, ոչ բանավեճ…»,- այսօր լրագրողների հետ զրույցում, ամփոփելով քարոզարշավն`ասաց Երեւանի ավագանու ընտրություններում ԲՀԿ համամասնական ցուցակի երկրորդ հորիզոնականը զբաղեցնող Պետրոս Ղազարյանը: Քարոզարշավի ամենադրական կողմը ավագանու թեկնածուն համարում է այն, որ ընտրակաշառք չբաժանվեց եւ բոլոր փորձերը`ԲՀԿ-ին այդ պիտակը փաթաթելու, ավարտվեցին ոչնչով:
ԲՀԿ-ի քաղաքապետի թեկնածու Նաիրա Զոհրաբյանն էլ տարակուսանք հայտնեց համացանցում հայտնված այն տեսագրությունների մասով, որոնք ներկայացվում էին իբրեւ ահազանգ`ԲՀԿ-ի`ընտրակաշառք բաժանելու մասին: Նա ուշադրություն հրավիրեց՝ ընտրակաշառքի ռոլիկների վրա, որ այդ մարդիկ «դուբլյոնկայով» էին 40 աստիճան շոգին:
«Ընտրակաշառքի մասին են խոսում, բայց ընտրություններից երկու օր առաջ կառավարությունը հանրապետության տաքսիստներին ազատեց հարկերից: Բոլորս էլ հասկանում ենք, չէ՞, որ սա երկար չի մնալու, որ խնդիրը չի լուծվել, հասկանում ենք, որ սոցիալական վճարները պետք է հստակեցնել, բայց հապշտապ դա անելը բերելու են նրան, որ այդ խնդիրները հետո շատ ավելի վատ ձեւով են լուծվելու»,- շարունակեց Պետրոս Ղազարյանը:
Նաիրա Զոհրաբյանն էլ մի զավեշտալի դեպք պատմեց, թե ինչու էին իրենց կուսակցության երկու անդամների հրավիրել Զեյթունի ոստիկանության բաժանմունք: Ահազանգ հնչեցրած կնոջը, պարզվում է, դուր չի եկել այն, որ այդ մարդիկ ԲՀԿ-ի նախընտրական բուկլետներ են բաժանում:
Այլ մանրամասները`տեսանյութում
Տիկին Զոհրաբյանը նաեւ հակընդդեմ ահազանգ հնչեցրեց. երեկ Կենտրոնում տարբեր երիտասարդներ բացել են երթուղայինների դռները եւ ասել`«ընտրելով ԲՀԿ-ին ընտրում եք Քոչարյանին»:
Լրագրողներից մեկը հետաքրքրվեց`ի՞նչ կանեք, եթե քաղաքապետ ընտրվի Հայկ Մարությանը: «Կշնորհավորեմ Նիկոլ Փաշինյանին համայն հայության եւ Երեւանի քաղաքապետ ընտրվելու կապակցությամբ»,- պատասխանեց Նաիրա Զոհրաբյանը:
Նելլի ԳՐԻԳՈՐՅԱՆ
