Այսօր վարչապետ Նիկոլ Փաշինյանը արձագանքելով Կառավարության առջեւ բողոքի ցույցի եկած Արծվաշենի փախստականներին, դուրս եկավ՝ լսելու նրանց հուզող խնդիրը: Արծվաշենի նախկին բնակիչները, որոնց բնակավայրն այժմ գտնվում է ադրբեջանական հատվածում, պահանջում իրենց համար կառավարության 2009 թվականի որոշումով հատկացված փոխհատուցումը: Նրանց մեծ մասն այժմ բնակվում է Ճամբարակում եւ ինչպես նրանք էին նշում, ապրելու համար անբարենպաստ պայմաններում:
Վարչապետը առաջարկեց հոկտեմբերի 2-ին հանդիպում կազմակերպել: «Առաջարկում եմ ձեւավորել հինգ հոգուց բաղկացած խումբ եւ հանդիպել ինձ»,- ասաց վարչապետը:
Ի դեպ, կրքերն այնքան էին բորբոքվել, որ մինչ վարչապետի իջնելը ցուցարարները փորձել են մուտք գործել ՀՀ կառավարության շենք:
Այն հարցին, թե ցուցարարներն այսօր թակում էին կառավարության շենքի դռներն ու փորձում ներս մտնել, վարչապետը պատասխանեց. «Իրենց դուռն է, կուզեն կխփեն»:
Լուսինե ԲՈՒԴԱՂՅԱՆ
