Ռեֆորմիստների քաղաքապետի թեկնածու Արտակ Ավետյանը քարոզարշավի շրջանակում վերամբարձ կռունկով է իջել «Դվին» հյուրանոցի շինհրապարակ:
Aravot.am-ը հիշեցնելով, որ ժամանակին ՔՊ առաջնորդ Նիկոլ Փաշինյանն էլ կտուրներն էր բարձրանում, նրանից հետաքրքրվեց` վերեւից իջնելն ինչ-որ խորհուրդ ունի՞ իր մեջ:
«Բացարձակ որեւէ խորհուրդ չկար դրա մեջ, քանի որ մասնագիտությամբ ռեժիսոր եմ, ուղղակի մտածեցինք որեւէ հետաքրքիր բան անել հանդիսատեսի համար, էֆեկտով ինչ-որ բան` հայտնվելու իմաստով: Ես եւ պարոն Աշոտ Ալեքսանյանը, որը «Դվին» հյուրանոցի առաջին ճարտարապետներից մեկն էր, որպես հնի ու նորի համախմբվածություն, որոշեցինք վերեւից իջնել: Պարոն Ալեքսանյանն էլ շատ ոգեւորվեց դրանից, ես էլ չմերժեցի: Ուղղակի մտածեցինք հիշվող բան անել, շոուի նման ստացվեց, մարդկանց համար հաճելի բան արեցինք, երեխաներն ուրախացան, հարցեր էին տալիս, թե բարձրության վրա ոնց էր…Սա էր ամբողջը, ուրիշ բան չկար»,-ասաց Արտակ Ավետյանը:
Հարցրինք` հնարավո՞ր է առաջիկա հանդիպումն էլ թատերականացված լինի, Արտակ Ավետյանը բացասական պատասխան տվեց. «Արդեն շոուի տարրեր չեն լինի, հաջորդ հանդիպումը շենգավիթցիների հետ է` իրենց խնդրանքով»:
Նրանից հետաքրքրվեցինք, թե ինչպես է գնահատում քարոզարշավի ընթացքը: Արտակ Ավետյանն ասաց, որ վերջին օրերին առկա բացասական դրսեւորումներին ամենեւին կողմ չէ. «Դրանով մեր թշնամիներին ենք ուրախացնում: Ինձ թվում էր քաղաքապետի ընտրությունը պետք է ավելի հանգիստ, հանդարտ ձեւով լիներ, մինչդեռ արհեստականորեն թեժացավ, ինչի կարիքը չկար, անկախ կուսակցական պատկանելությունից բոլորս հայ ենք, մի ազգից ենք: Ինչ վերաբերում է իմ քարոզարշավին, ես գոհ եմ…»:
Գոհար ՀԱԿՈԲՅԱՆ
