Ավագանու ու քաղաքապետի թեկնածուները նախընտրական ծրագրերում Երեւանի այգիները զվարճանքի օբյեկտներից բեռնաթափելու, կանաչ տարածքներն ավելացնելու, դրանք սոցիալական խմբերին հարմարեցնելու առաջարկներ են ներկայացնում, սակայն գրեթե բոլոր քաղաքական ուժերի ծրագրերում այս ոլորտի խնդիրները ընդհանրական են, ոչ հասցեական, մինչդեռ որոշ այգիներում օբյեկտներ գրեթե չկան, կանաչ տարածքներ էլ` որքան ուզես: Հավանաբար թեկնածուների հասցեական լուծումները բացակայում են, քանի որ նրանք մեկ առ մեկ չեն այցելել ու ուսումնասիրել հանրային այգիների առանձնահատկությունները: Սունդուկյանի թատրոնի հարեւանությամբ գտնվող հանրային այգին արդեն քանի տարի է՝ պարզապես բռնազավթված է անհայտ կազմակերպության կողմից: Տարբեր հատվածներ ժապավենով պատված են, եւ քաղաքացիների մուտքն այնտեղ արգելված է:
«Սահմանախախտ» քաղաքացիներին հարեւան «էլիտար» շենքերի պահակը խստորեն զգուշացնում է` տարածքը լքել, հակառակ դեպքում միջոցներ կձեռնարկի, սակայն նա որեւէ փաստաթղթով չի հիմնավորում տարածքի «տերը» լինելու փաստը: Ի դեպ, հանրային տարածքում ժամանակին տեղադրված Լիպարիտ Մխչյանի արձանը եւս հայտնվել է «էլիտարի» բռնազավթած տարածքում: Լիպարիտ Մխչյանը Հայաստանում սովետական կարգերի հաստատման համար մղված պայքարի մասնակից է:
Լուսանկարները`
ԼՈՒՍԻՆԵ ԲՈՒԴԱՂՅԱՆԻ
«Առավոտ»
19.09.2018
