Երևանի ավագանու «Լույս» դաշինքի թեկնածու Թեհմինա Վարդանյանը վստահեցրեց՝ իրենց ծրագրի յուրաքանչյուր դրույթ միտված է սոցիալական խնդիրների լուծմանը:
«Հոդված 3» ակումբում «Սոցիալական և առողջապահական խնդիրները Երևանում. ինչպիսի՞ ծրագրային լուծումներ են առաջարկում քաղաքական ուժերը» թեմայով քննարկմանը Թեհմինե Վարդանյանը կարևորեց հատկապես պոլիկլինիկաների խնդիրը: Այս առիթով նա մանրամասնեց. «Ունենք պոլիկլինիկաների ոչ ճիշտ կառավարում: Այս ոլորտը բարձիթողի վիճակում է եղել, ինչը հանգեցրել է նաև կոռուպցիոն դրսևորումների: Այս ոլորտը կարիք ունի արդար և արդյունավետ կառավարման»:
Թեհմինե Վարդանյանը տեղեկացրեց՝ Երևանի բյուջեից 80 միլիոն կրճատվել է առողջապահական մասից. «Փոխարենը քաղաքապետարանը երկու միլիոն տրամադրել է հասարակական զուգարանին, որը չի գործում, չի գործել, 11 միլիոն դրամ է տրամադրվել ավագանիների ասոցիացիային, որից որևէ պատասխանատու չգտանք, չիմացանք՝ այն ինչ է և ինչով է զբաղվում»:
Թեհմինե Վարդանյանը մտահոգություն հայտնեց, որ եղել են ընթացիկ բազում անհարկի ծախսեր. «Այսքանով հանդերձ, պարտադիր է մասնավոր-համայնք համագործակցությունը, ներդրողներին ներգրավելը, քանի որ բյուջեն փոքր է: Առանց մասնավորի և ներդրողի մենք չենք կարողանա հինգ տարվա մեջ կառուցել երեք գերժամանակակից պոլիկլինիկա»:
Երևանի ավագանու «Ժառանգություն» կուսակցության թեկնածու Դավիթ Գրիգորյանը բարձրացրեց տրանսպորտի հարցը. «Աշխարհում կան նախադեպեր, հաջողված կարող է լինել էլեկտրական ավտոմեքենաների ներկրումն ու փորձարկումը Երևանում: Երևանում արևային ջրատաքացուցիչներ տեսնում ենք, բայց արևային մարտկոցները կուզեինք, որ լինեին քաղաքապետարանի ուշադրության կենտրոնում»:
Դավիթ Գրիգորյանը վստահ է՝ եթե բյուջեն չմսխվի, չփոշիացվի և արդյունավետ կառավարում լինի, բյուջեն կբավականացնի: Դավիթ Գրիգորյանը քաղաքապետարանի նախկին աշխատանքներից մի դրվագ պատմեց. «Պոլիկլինիկային նվիրել են ինչ-որ անալիզատոր, որի արժեքը մասնավորը սահմանել է ինը հարյուր հազար դրամ, իսկ քաղաքապետարանը ձեռք է բերել մեկուկես միլիոնով»:
Երևանի ավագանու «Իմ քայլը» դաշինքի թեկնածու Սերգեյ Սարգսյանի համոզմամբ՝ խնդիրների լուծումը պետք է լինի համալիր. «Առողջապահության համակարգը կանխորոշում է առողջապահության 20 տոկոսը, մնացված 80 տոկոսը կանխորոշում է հայկական հետաքրքիր գենետիկան: Դրանից բացի կա շրջակա միջավայր և վարքագիծ: Բոլոր ծրագրերը պիտի ունենան համալիր բնույթ»:
Երևանի ավագանու «Երկիր Ծիրանի» կուսակցության թեկնածու Սիլվա Վարդանյանը ևս կարևորեց արդյունավետ կառավարումը. «Կարևոր է պոլիկլինիկաների և կրթական հաստատությունների վերազինումը, կարևոր է նաև սահմանել վերահսկողություն: Երևանը պետք է էգոիստ քաղաքից վերածվի ներառական քաղաքի: Քաղաքը պետք է մատչելի լինի ոչ միայն ավտոմեքենաների, այլև բնակիչների համար»:
Տաթև ՀԱՐՈՒԹՅՈՒՆՅԱՆ
Լուսանկարը՝ «Հոդված 3» ակումբի
