Ոստիկանությունը խուզարկություն էր իրականացրել «Yerevan.today» կայքի խմբագրությունում ու առգրավել կրիչներ, կոշտ սկավառակ, համակարգիչներ: Այս կայքը կապում են երկրորդ նախագահ Ռոբերտ Քոչարյանի անվան հետ, սակայն այսօր հրավիրած ասուլիսում կայքի գլխավոր խմբագիր Սեւակ Հակոբյանը հերքեց դա՝ վստահեցնելով, որ նա որեւէ առնչություն չունի:
Այսօր Aravot.am-ը Սեւակ Հակոբյանից հետաքրքրվեց՝ խուզարկությունից հետո Քոչարյանը, նրա մտերիմները, իր շրջապատի մարդիկ փորձե՞լ են կապ հաստատել ձեզ հետ, առաջարկել որեւէ աջակցություն: Նա պատասխանեց. «Ես օգնության, աջակցության առաջարկ ստացել եմ իրավապաշտպանների կողմից եւ նման օգնության առաջարկ հայտնել են փաստաբաններ, որոնք Քոչարյանի փաստաբանները չեն, որոնք հրապարակային ստանձնել են իր գործը»:
«Yerevan.today» կայքի գլխավոր խմբագիրն ասաց, որ իրենց աջակցություն են ուզում ցույց տալ քաղաքացիներ, առաջարկում են, որ համակարգիչներ նվիրեն:
Մեր հարցին՝ հաստատ Քոչարյանի թիմի հետ որեւէ կապ չկա՞, որեւէ աջակցություն՝ Սեւակ Հակոբյանը պատասխանեց՝ երդվելով. «Հորս արեւ»:
Թե ինչու են կայքը կապում Քոչարյանի հետ՝ խմբագիրն ասաց. «Այնքան դժվար է պայքարել մի բանի դեմ, երբ սկզբից ինֆորմացիան գնում է: Ամենահավանականն այն էր, որ մեզ կապում էին Հրանուշ Հակոբյանի հետ»:
Դիտարկմանը, որ Քոչարյանը պատահական ԶԼՄ-ների հարցազրույց չի տալիս՝ Սեւակ Հակոբյանը պատասխանեց՝ «НТВ»-ն էլ էր իրենը, «Երկիր Մեդիան» ի՞նչ կապ ունի, «Մեդիամաքսի՞» հետ ինչու չեն կապում:
Հռիփսիմե ՋԵԲԵՋՅԱՆ
