«Հայք» կուսակցության Երեւանի ավագանու 2-րդ համարի թեկնածու Հրաչյա Սարգսյանը սեպտեմբերի 18-ին «Հայելի» ակումբում կայացած ասուլիսում նշեց, որ իրենք Նիկոլ Փաշինյանին ընկալում են որպես սպիտակ ուժ, հետեւաբար «Հայքը» սպիտակ ուժերի հետ է:
Միաժամանակ անդրադառնալով «Իմ քայլը» դաշինքի քաղաքապետի թեկնածու Հայկ Մարությանին՝ Հրաչյա Սարգսյանն ասաց, որ լավ կլիներ, եթե վարչապետը չմասնակցեր նրա քարոզարշավին: Պարոն Սարգսյանը նաեւ կարծում է, որ Նիկոլ Փաշինյանը մեծ վարկանիշ ունի, ինչը վաստակել է, սակայն լավ կլինի, որ թողնեն ժողովուրդը հանգիստ ընտրություն կատարի, քանի որ այլեւս կաշառքը բացառվում է:
«Հայաստանում, որտեղ 30-ից ավելի տոկոսն աղքատ է, որտեղի՞ց այդքան միջոցներ, որ այդքան պաստառներ են փակցնում, հազարավոր դոլարներ արժողությամբ: Մենք որոշեցինք, որ նման շռայլություն չի կարելի թույլ տալ»,-ասաց Հրաչյա Սարգսյանը՝ հավելելով, որ պաստառների համար նախատեսված գումարը պատրաստ են ուղղել որեւէ ծնողազուրկի կամ զոհված ազատամարտիկի ընտանիքի:
Խոսելով, իր ձեւակերպմամբ, իրենց հեղափոխության տղերք հայտարարողներից, նա ասաց. «Հեղափոխությունը երեկ չէր, ապրիլ -մայիս ամիսներին չէր, 1996 թ.-ին էլ է եղել հեղափոխություն, ձեր խոնարհ ծառան ճաղերն անցնողներից մեկն է եղել: 2003-ին հեղափոխություն էր փաստորեն, որ 2004-ին ծեծ ու ջարդով ԱԺ շեմին մեր հայրենակիցների հետ էդպես վարվեցին, 80-ն անց լուսավոր մարդիկ կային շարժման առաջամարտիկներից, որ այդ օրը ֆիզիկական բռնության ենթարկվեցին…Հիմա կարծես այդ ամենը մոռացվում է ու հայտարարվում է` մենք հեղափոխության տղերքն ենք: Կներեք էլի, ձեր կենսագրության չափ մենք հեղափոխության մասնակից ենք»:
Նժդեհյան ցեղակրոն կուսակցության նախագահ եւ «Հայք» կուսակցության կողմից առաջադրված քաղաքապետի թեկնածու Գևորգ Հովսեփյանն էլ «Նոյյան տապանում» խոսեց առաջիկա ընտրություններից, արժեքների հեղափոխությունից:
«Կուսակցություններն այսօր հանդես են գալիս ոչ թե ծրագրերով, այլ զուտ լոզունգներով: Իսկ նախորդ իշխանությունները չունեի՞ն այդ ծրագրերը, բայց ո՞վ էր դրանք իրականացնելու: Նրանք Երեւանը վեր էին ածել փող աշխատելու գործիքի»,-ասաց Գեւորգ Հովսեփյանը:
Նաեւ ցավով փաստեց, որ արժեհամակարգի փոփոխություններ են եղել Հայաստանում, որոնք պետք է շտկել: Նա նույնիսկ թվարկեց, թե ովքեր են ժողովրդի թշնամիները. «Մեզ սկսեցին համոզել, որ սխալ ենք ապրում, ճիշտ են շքեղ մեքենաները, դղյակները, ամեն գնով հաճույք ստանալը»: Գեւորգ Հովսեփյանը համոզված է, որ արմատներին վերադարձը պետք է սկսել նախ եւ առաջ մշակույթից:
Գոհար ՀԱԿՈԲՅԱՆ
