Երեւանի ավագանու ընտրություններում ԲՀԿ ցուցակը գլխավորող Նաիրա Զոհրաբյանը չի ընդունում «Քաղաքացիական պայմանագիր» կուսակցության քաղաքապետի թեկնածու Հայկ Մարությանի առաջարկը՝ քաղաքապետի 12 թեկնածուներով բանավիճելու:
Հիշեցնենք, որ նախկինում Հայկ Մարությանը հրաժարվում էր անհատական բանավեճերի ձեւաչափից: Այսօր նա առաջարկ հնչեցրեց, որ կբանավիճի, եթե բոլոր մրցակիցներով լինեն: Նաիրա Զոհրաբյանը մերժում է այդ ձեւաչափը, քանի որ այն արդյունավետ չի համարում:
Երեկ Մալաթիա-Սեբաստիա համայնքում քարոզարշավի ժամանակ ԲՀԿ ներկայացուցիչները բավական կոշտ էին արտահայտվել, ինչից հետո սոցիալական ցանցերում հակադարձումները վերածվեցին վիրավորանքներով վեճերի: Այսօր Նոր Նորք վարչական շրջանում քարոզարշավի ժամանակ ԲՀԿ փոխնախագահ Սերգեյ Բագրատյանն իր ելույթում հիշեց վարչապետ Նիկոլ Փաշինյանին, ով հայտարարում է, թե բոլորս մի ընտանիք ենք: Սերգեյ Բագրատյանը նկատեց՝ «ընտանիքում չի կարելի կնոջը վիրավորել»: Նա հորդորեց նաեւ չգնալ անտագոնիզմի ճանապարհով, իսկ ԲՀԿ-ական ԱԺ փոխնախագահ Միքայել Մելքումյանն էլ ասաց, որ Հայաստանի ապագան վճռվելու է սեպտեմբերի 23-ին կայանալիք Երեւանի քաղաքապետի ընտրություններում, կախված այդ ընտրությունների որակից եւ արդյունքից հստակություն կմտնի, թե ինչպիսի Հայաստան ենք ունենալու վաղը:
ԲՀԿ քաղաքապետի թեկնածու Նաիրա Զոհրաբյանն էլ հայտարարեց. «Երեկ խոսեցինք ճշմարտության մասին: Ճշմարտությունը ծանր է լինում»: Սակայն տիկին Զոհրաբյանը չի պատկերացրել, որ ճշմարտությունն այդչափ ծանր կարող է լինել, ինչեւէ, Նաիրա Զոհրաբյանն ասաց, որ ինքը չի կոտրվել: Նա նաեւ ընդգծեց, որ արատավոր է, երբ ողջ պետական մեքենան, թողած բանուգործը, սոցիալական ցանցերում անդրադառնում էր երեկ իր հնչեցրած ճշմարտությանը: Նաեւ խոստովանեց՝ այդ ամենից հետո իր ինքնագնահատականը բարձրացել է, բայց ինքն այն կարծիքին է, որ պետական ծառայողները պետության հոգսերով պիտի զբաղվեն:
Ի դեպ, այսօր ԲՀԿ խմբակցության պատգամավորները հայտնել էին, որ Նոր Նորքում քարոզարշավին պետք է մասնակցի նաեւ Գագիկ Ծառուկյանը, սակայն նա չեկավ, ավելի ուշ պարզաբանեցին, որ տեխնիկական խնդիրներ են առաջացել:
Այլ մանրամասները՝ տեսանյութում:
Նելլի ԳՐԻԳՈՐՅԱՆ
