Վերջին ժամանակները մամուլում տեղ են գտել մի շարք հրապարակումներ Երևանի Վ. Բրյուսովի անվան պետական լեզվահասարակագիտական համալսարանի (ԵՊԼՀ) ուսանողական խորհրդի անդամների անունից:
Այդ կապակցությամբ հայտնում ենք, որ վերոնշյալ ուսանողները չեն ներկայացնում ԵՊԼՀ ուսանողական խորհուրդը, քանի որ փաստացի վերոնշյալ կառույցը լուծարված է: ԵՊԼՀ-ի ուսանողները 2018 թվականի մայիսի 17-ին համալսարանում իրականացրել են ստորագրահավաք՝ համալսարանում գործող ուսանողական խորհուրդը լուծարելու և նորը ստեղծելու վերաբերյալ:
Ստորագրահավաքին մասնակցել են համալսարանի ուսանողների մեծամասնությունը (3070 ուսանողից 1621-ը)՝ տալով իրենց համաձայնությունը ուսանողական խորհուրդը լուծարելուն: Այնուհետև, սույն թվականի մայիսի 24-ին ուսանողները հրավիրել են համընդհանուր համաժողով, որի ընթացքում ևս մեկ անգամ կայացրել են որոշում գործող ուսանողական խորհուրդը լուծարելու մասին և ընդունել են հռչակագիր: Բացի այդ, համաժողովի ընթացքում բաց քվեարկությամբ՝ ձայների մեծամասնությամբ, ձևավորվել է ուսանողական խորհրդի նոր ժամանակավոր կազմ, որին ԵՊԼՀ ուսանողությունը լիազորել է մշակել ուսանողական խորհրդի նոր կանոնադրությունը: Նշված գործընթացները ՀՀ կրթության և գիտության նախարարի կողմից համարվել են «իրավաչափ» (կից՝ Ձեզ ենք ներկայացնում ՀՀ ԿԳՆ գրությունը): Առկա է նաև տեսանյութը ԵՊԼՀ ուսանողական խորհրդի լուծարման վերաբերյալ:
Ուսանողական խորհրդի նոր կանոնադրությունը արդեն իսկ մշակվել է և ներկայացվել ՀՀ կրթության և գիտության նախարարություն հաստատման: Համաձայն հաստատված կանոնադրությամբ սահմանված կարգի կիրականացվի ուսանողական խորհրդի կազմավորումը:
Չնայած ԵՊԼՀ ուսանողական խորհրդի լուծարման մասին ՀՀ ԿԳՆ գրությանը, նախկին ուսանողական խորհրդի մի խումբ ուսանողներ, տարբեր լրատվամիջոցներում և իրենց դեռևս գործող ֆեյսբուքյան էջում (ԵՊԼՀ ուսանողական խորհուրդ) ներկայանում են իբրև ԵՊԼՀ ՈՒԽ անդամներ և նամակների տեսքով շարունակում են ապատեղեկատվությունը որպես «հավաստի տեղեկություն» հրամցնել հանրությանը:
ԵՊԼՀ ուսանողություն
