«Գնացեք-միացեք Փաշինյանին՝ պրծեք էլի, թողեք տղեն աշխատի…»,-«Լույս» դաշինքի քաղաքապետի թեկնածու Արտակ Զեյնալյանին այսօր այս խոսքերով դիմավորեց Էրեբունու համայնքի բնակիչներից մեկը:
Զեյնալյանը փորձեց բացատրել, որ իրենք իրենց դաշինքով են նախընտրում մասնակցել Երեւանի ավագանու ընտրություններին, սակայն պապիկն անդրդվելի էր. «Բայց ինչո՞ւ չեք միանում Փաշինյանին՝ միանգամից Հայկոն ընտրվի, հը՞, ավելի լավ չի լինի՞»:
Պապիկի հասակակիցները եւս անտարբեր գտնվեցին «Լույս»-ի նախընտրական ծրագրի հանդեպ, սակայն Արտակ Զեյնալյանը նշեց. «Ընտրություններին առանձին ենք մասնակցում, եւ դուք եք որոշում՝ ո՞վ լինի քաղաքապետ: Լավ մնացեք, հաջողություն ձեզ»:
Հիշեցնենք, որ սեպտեմբերի 23-ին կայանալիք Երեւանի ավագանու ընտրություններին «Հանրապետություն» եւ «Լուսավոր Հայաստան» կուսակցությունները մասնակցում են «Լույս» դաշինքով («Ելք» դաշինքի մյուս կուսակցությունը՝ Նիկոլ Փաշինյանի «Քաղաքացիական պայմանագիրը», ընտրություններին մասնակցում է առանձին»):
Բակերից մեկում էլ մի տատիկ մոտեցավ Արտակ Զեյնալյանին՝ ներկայացնելով իրենց շենքի վիճակը. «Մեռա էս շենքի համար նամակ գրելով, ոչ-ոք ոչ մի բան չի անում: Անդրանիկ Մարգարյանին գիտե՞ս քանի նամակ եմ գրել: 81 թվից այս շենքն այս վիճակում է՝ ոչ գյուղում ենք ապրում, ոչ քաղաքում…աղբի մեջ կորած է, նկուղային հարկում ինչ աղբ ասես՝ կա»:
Արտակ Զեյնալյանին մեկ այլ բնակիչ էլ տեղեկացրեց, որ շենքի ջրահեռացման համակարգը եւ կոյուղատարը վատթար վիճակում են: Ապա տատիկը պահանջեց խոստանալ, որ շենքը հիմնանորոգելու են:
Արտակ Զեյնալյանն էլ նշեց, որ Երեւանի ավագանու «Ելք» խմբակցության ավագանիները տեղյակ են այդ շենքի խնդրից, եւ անպայման կզբաղվեն:
Մի տղամարդ էլ Արտակ Զեյնալյանին առողջություն եւ երկար կյանք մաղթեց՝ կոչ անելով մտածել ժողովրդի մասին: «Երեք նախագահներն արնաքամ արեցին ժողովրդին: Փաշինյանից հետո քաղաքապետն է կարեւոր: Նա ոսկի մարդ պետք է լինի եւ ժողովրդի մասին մտածի»,-համոզմունք հայտնեց տղամարդը:
Հետո նա վարչապետին անդրադարձավ. «Այդ ի՞նչ ուժեր են Փաշինյանին խեղճացրել: Լուրջ եմ ասում՝ խեղճացրել են: Զեյնալյան, դու կողմնակի ուժերից չվախենաս»:
Լուիզա ՍՈՒՔԻԱՍՅԱՆ
