«Քաղաքացիների կողմից արդեն իսկ շատ ահազանգեր ենք ստացել, բայց ընտրակաշառքի մասին որեւէ փաստ չունենք, այսինքն՝ փաստացի արձանագրված դեպք չունենք: Փոխարենը, տեսադաշտում ունենք այնպիսիններին, որոնք ընդունակ են իրականացնել այդ արատավոր երեւույթը»,-ՀՀ ոստիկանապետին կից հասարակական խորհրդի հերթական նիստում այսօր անդրադառնալով սեպտեմբերի 23-ին կայանալիք Երեւանի ավագանու ընտրություններին, ասաց ՀՀ ոստիկանապետ Վալերիյ Օսիպյանը: Նրա խոսքով՝ ոստիկանությունը բացառելու է թեկնածուների կամ կուսակցությունների կողմից քաղաքացիներին գազել-ավտոբուսներով դեպի ընտրատեղամասեր «կրելու» երեւույթը:
«Թույլ չենք տա, որ որեւէ թեկնածուի օգտին ավտոբուս բերեն բակեր: Բացառելու ենք, որ որեւէ թեկնածու հոգեբանական ճնշում գործադրի բնակիչների վրա»,-վստահեցրեց ՀՀ ոստիկանապետը: Նրա խոսքով՝ որոշ դեպքերում քաղաքացիներն ահազանգել են, որ այսինչ անձը այսինչ անձին կաշառք է փոխանցում. հայտնաբերվել են այդ անձինք, բայց ոչ՝ կաշառքի փաստը:
Վալերիյ Օսիպյանն անդրադարձավ նաեւ ահազանգերին, թե որոշ դեպքերում քաղաքացիներին կաշառք են բաժանել փոստային առաքման միջոցով: «Դա հնարավոր է, բայց մենք չենք արձանագրել նման փաստացի դեպք»,-նշեց նա:
https://www.youtube.com/watch?time_continue=9&v=uOYZRDx30yU
Լուիզա ՍՈՒՔԻԱՍՅԱՆ
