«Այս ընտրությունները պետք է լինեն բացառիկ՝ թափանցիկության, արդարության եւ օրինականության առումով: Ավանդական ընտրակեղծարարներն այս ընտրություններում տեղ չպետք է ունենան»,-ոստիկանապետին կից հասարակական խորհրդի հերթական նիստում այսօր հայտարարեց ՀՀ ոստիկանապետ Վալերիյ Օսիպյանը: Նրա խոսքով՝ սեպտեմբերի 23-ին կայանալիք Երեւանի ավագանու ընտրությունները նոր Հայաստանի առաջին ընտրություններն են լինելու, ուստի դրանք աննախադեպ պետք է լինեն. «Այսուհետեւ կանխելու ենք ընտրակեղծարարության ցանկացած դեպք: Ոստիկանության այն աշխատակիցները, որոնց տեսադաշտում դա կկատարվի, կենթարկվեն պատասխանատվության»:
ՀՀ ոստիկանապետի բնորոշմամբ՝ առաջին անգամ է, երբ ոստիկանությունը նման պատասխանատվություն է վերցնում իր վրա. «Ընտրախախտումների փորձերը արդեն իսկ սկսվել են ուրվագծվել. պայքարն այդ երեւույթների դեմ արդեն սկսել ենք, մեծ ծավալի ծանրաբեռնվածությամբ ենք աշխատելու: Վերահսկելու ենք ընտրական իրավունքի ենթադրյալ խախտման ցանկացած դեպք: Թող որեւէ մեկը չկասկածի, որ մենք քաղաքական կամք ունենք եւ օրինականությամբ ենք առաջնորդվելու»:
Վալերիյ Օսիպյանը տեղին է համարում ընտրախախտումների առնչությամբ վերջին օրենսդրական խստացումները. «Այսպես, թեկնածուների եւ կուսակցությունների կողմից բարեգործության անվան տակ ընտրողներին նյութական արժեք տալը վարչական իրավախախտում կհամարվի: Իսկ ընտրողի կողմից կաշառքի խոստումն ընդունելու, կաշառք վերցնելու կամ պահանջելու համար կնախատեսվի քրեական պատասխանատվություն»: Օսիպյանը վստահեցրեց, որ Ոստիկանությունն ապաքաղաքական կառույց է. «Բոլոր թեկնածուները ոստիկանության համար հավասար են եւ յուրաքանչյուրի հանդեպ կատարված խախտումները համարժեք գնահատական կստանան:
https://www.youtube.com/watch?v=uOYZRDx30yU
Լուիզա ՍՈՒՔԻԱՍՅԱՆ
