ՀՀ վարչապետ Նիկոլ Փաշինյանը սեպտեմբերի 14-ին Փարիզի Pavillon Gabriel սրահում հանդիպել է ֆրանսահայերի հետ, ինչը ներկայացվեց Ֆեյսբուքյան ուղիղ միացմամբ:
Պատասխանելով Ղարաբաղի հիմնահարցի կարգավորման վերաբերյալ հնչած հարցին, վարչապետն ասաց, որ Ֆրանսիայի նախագահ էմանուել Մակրոնի հետ խոսել են այդ թեմայով: Ասաց նաեւ, որ ՀՀ եւ Ադրբեջանի երկրների ղեկավարների մակարդակով հանդիպման մասին դեռեւս խոսք չկա:
«Պարոն Մակրոնի հետ մենք մտքեր փոխանակեցինք, ես ասացի, որ Ադրբեջանի ղեկավարը եւ ղեկավարությունը այնքան էլ անկեղծ չէ, երբ խոսում է խնդրի կարգավորման մասին: Տարածաշրջանում կա կարգավորման մթնոլորտ, իսկ Ադրբեջանից լսում ենք միայն սպառնալիքներ, ինչի պարագայում կարգավորումն այդքան էլ իրատեսական չէ: Այնուհետեւ ասացի, որ Ադրբեջանն էլ դեռ չի արձանագրել, որ սա արդեն այլ Հայաստան է, որտեղից չի լինելու գործողություն ընդդեմ Ադրբեջանի, այլ լինելու է ողջ հայության կողմից համախմբված գործողություն եւ դուխով հայ ժողովրդի կողմից: Իհարկե այս ամենը ասացի պարոն Մակրոնին, բայց մի փոքր այլ ձեւակերպումով»,-ասաց Փաշինյանը:
Հարցին, թե կա՞ որեւէ ներքաղաքական լարվածություն, Նիկոլ Փաշինյանը ժպտալով պատասխանեց. «Ի՞նչ ներքաղաքական լարվածություն»: Վարչապետն ասաց նաեւ, որ հեղափոխությունը եկել է, որ հայությանը համախմբի, եկել է հայության ազդեցությունը մեծացնելու համար, հեղափոխությունը չի եղել, որ չարախոսենք իրար: Հեղափոխությունը տեղի ունեցավ այն ժամանակ, երբ Հայաստանի Հանրապետության մարդիկ սկսեցին սիրել իրար»:
Գոհար ՀԱԿՈԲՅԱՆ
