Այսօր Ռոբերտ Քոչարյանի փաստաբանները ԱԱԾ տնօրենի եւ ՀՔԾ պետի գաղտնալսումների հետ կապված «Սպուտնիկ Արմենիա» սրահում ասուլիս էին հրավիրել:
Լրագրողները հետաքրքրվեցին՝ ՀՔԾ պետը խոսեց զրահաբաճկոնների մասին, որոնք տրվել են օլիգարխների թիկնապահներին, ի՞նչ կասեք այս մասին: Քոչարյանի փաստաբան Հովհաննես Խուդոյանը պատասխանեց, որ առնվազն պետք է ապացուցվի՝ այդ զրահաբաճկոնները ինչ-որ հանցագործությա՞ն են ծառայել, թե՞ ոչ, եթե այո, ապա ո՞ր անձանց կողմից»:
Հարցին՝ տարօրինակ չի՞, որ ՊՆ-ից 90 զրահաբաճկոն են տալիս օլիգարխների թիկնապահներին: Հայկ Ալումյանը պատասխանեց. «Իհարկե, տարօրինակ է ու ՀՔԾ-ն պետք է այդ տարօրինակությունները պիտի պարզի, այլ ոչ թե այդ տարօրինակություններով մանիպուլյացիաներ անի հենց այն ժամանակ, երբ դա իրենց պետք է: Ինձ իմ մասնագիտական փորձը ցույց է տվել, որ եթե որեւիցե կարեւոր գաղտնի ինֆորմացիա 3 հոգու եւ ավելի հայտնի է, այդ ինֆորմացիան շատ շուտով հայտնի է դառնում իրավապահ մարմիններին: Հիմա 10 տարի առաջ 10 հոգու սպանել են, էլ չասած վիրավորներին ու այսօր մեզ ուզում են հավատացնեն, որ այդ 10 հոգու սպանողները դեռ պարզված չեն, ես չե՛մ հավատում: Ինձ դա չի համոզում: Դուք անուններ ուզեք, մեղադրանքներ ուզեք, ոչ թե ընդամենը՝ մենք պարզել ենք, որ այս ուժերն են կրակել այս նպատակներով, ո՞ւր է մեղադրանքը»:
Հարցին՝ տարօրինակ չի՞, որ մարդիկ են սպանվել, անցել է 10 տարի, որեւէ մեկին մեղադրանք չի առաջադրվել, այն դեպքում, երբ հարյուրավոր ցուցարարներ են դատապարտվել՝ Հայկ Ալումյանը պատասխանեց. «Այո, տարօրինակ է եղել 10 տարի եւ հիմա էլ տարօրինակ է»:
Ալումյանը նշեց, որ կոնկրետ զրահաբաճկոնների հարցը Ռոբերտ Քոչարյանի հետ չեն քննարկել, որովհետեւ մեղադրանքում այդպիսի դրվագ չկա: Բայց որպես գերագույն գլխավոր հրամանատար, այս կարգի մանրուքների մեջ երբեք այդ մակարդակի պաշտոնյան չի խորանում»:
Հարցին՝ մանրո՞ւք եք համարում ՊՆ-ի զրահաբաճկոնները օլիգարխների թիկնազորին տրամադրելը՝ Ալումյանը պատասխանեց. «Ինձ համար դա մանրուք չի, ինձ համար դա սենսացիա է, բայց իմ կարծիքով երկրի նախագահի մակարդակով այդ հարցը հազիվ թե քննարկվեր»:
Հռիփսիմե ՋԵԲԵՋՅԱՆ
