Այսօր Լոռու մարզի Դարպաս համայնքում պաշտոնապես բացվեց գյուղատնտեսական նշանակության հակակարկտային ցանցերի արտադրամասը: Արտադրողը իտալական «Կարմա» ընկերությունն է:
-Մենք արտադրում ենք՝ ցանցեր, սյուներ եւ այլ սարքավորումներ, որոնք գյուղատնտեսին կտան հնարավորություն, որպեսզի կարողանան բերքը կարկուտից պաշտպանել: Տեխնոլոգիան 100 տոկոս իտալական է: Մենք ամեն ինչ անելու ենք, որպեսզի կարողանանք մեծացնել արտադրվող ապրանքատեսականիները: Նախատեսում ենք արտադրել նաեւ կարտոֆիլի, սոխի եւ այլ ապրանքների տեղափոխման համար պարկեր: Բայցի այդ, այս տեխնոլոգիայով կարելի է նաեւ ջինսե հագուստ արտադրել, փոխելով հաստոցի թելն ու ասեղները,- ասում է «Կարմա» ընկերության տնօրեն Անդրեա Կարապետյանը:
Արտադրամասը հագեցած է նորագույն սարքավորումներով: Անդրեա Կարապետյանը վստահեցնում է՝ 2018 թվականի սարքավորումներով հագեցած նմանօրինակ արտադրամասերի թիվն աշխարհում չի գերազանցում մեկ տասնյակը: Այս ընկերությունը դրանցից մեկն է:
Արտադրամասի բացմանը ներկա էր նաեւ ՀՀ գյուղատնտեսության նորանշանակ փոխնախարար Արտակ Քամալյանը: Նա տեղեկացրեց, որ նախարարությունը ունի ծրագրեր, որոնց միջոցով պատրաստում են աջակցել գյուղացիներին՝ ձեռք բերելու ընկերության տված արտադրանքից. «Մենք ունենք ծրագիրը, որը 2 տոկոսով վարկեր է տալիս գյուղացիներին: Հուսով եմ, որ նրանք կարող են օգտագործել այդ վարկերը, ձեռք բերել գործարանի արտադրանքից, որի արդյունքում կբարձրացնեն իրենց գյուղատնտեսության տնտեսական կայունությունը եւ կնվազեցնեն կորուստները»:
Պատասխանելով Aravot.am-ի հարցին, թե արդյոք կառավարությո՞ւնը պատրաստվում է աջակցություն ցուցաբերել վերջին օրերին կարկուտից տուժած համայնքներին, փոխնախարարն ասաց. «Ես 4-րդ օրն է, որ աշխատում եմ նախարարությունում, եւ որքանով որ տեղյակ եմ նախարարությունն այդ ուղղությամբ քայլեր է ձեռնարկում: Դա այնքան էլ հեշտ գործ չէ, բայց կարծում եմ, ինչ-որ մի կերպ կառավարությունը կօգնի գյուղացիներին՝ այդ կորուստների մի մասը վերականգնելու համար»:
ՀՀ տնտեսական զարգացման եւ ներդրումների փոխնախարար Ավագ Ավանեսյանն էլ տեղեկացրեց, որ գործարանի ստեղծման գործում կառավարությունն ունեցել է իր աջակցությունը. «Ընկերությունը ՀՀ կառավարությանը ներկայացրել էր ծրագիր, որի համաձայն սարքավորումների ներմուծման համար ազատվել է մաքսատուրքից, ինչպես նաեւ ԱԱՀ-ն հետաձգվել է 3 տարով: Արդյունքում ստեղծվում է 24-ից ավելի աշխատատեղ, որը զբաղվածության վրա էլի դրական ազդեցություն կունենա»:
Այս պահին արտադրամասն ունի 20-ից ավելի աշխատակից, որոնք 2 ամիս պատրաստվել են Իտալիայում:
Իսկ արտադրվող կարկուտապաշտպան ցանցերի համար 20 տարվա երաշխիք են տալիս: Վստահեցնում են, ցանցերն ապահովում են 100 տոկոս արդյունք:
Տաթեւիկ ՂԱԶԱՐՅԱՆ
