Առանց կանխավճարի, հիփոթեքով բնակարանի ձեռքբերում Երևանում, քաղաքային տնտեսության զարգացում և արդիականացում, աշխատատեղերի ստեղծում, փոքր ու միջին գործարարության զարգացում, վերելակների նորոգում, ավտոբուսների, տրոլեյբուսների թվի ավելացնում. այսպիսի կարգախոս-խոստումներ հնչեցրեց այսօր ՕԵԿ-ը Աջափնյակում:
ՕԵԿ քաղաքապետի թեկնածուն բոլոր խնդիրներից Աջափնյակում հատուկ առանձնացրեց վթարային շենքերի խնդիրը: Նա հայտարարեց. «Վթարային շենքերի խնդիրը, հատկապես Աջափնյակում առաջնահերթ լուծում է պահանջում, քանի որ այդ շենքերը առաջնային վտանգ են ներկայացնում բնակիչների համար»:
Քաղաքապետի թեկնածուն շեշտեց՝ Աջափնյակում մետրոյի նոր կայարանի կառուցումը առանցքային, պարտադիր է ու հավաստիացրեց. «Մեր հաշվարկները ցույց են տալիս, որ այդ ֆինանսական հնարավորությունը կա»:
Ըստ Մհեր Շահգելդյանի՝ պետք է բարձրանա ավագանու դերն ու նշանակությունը, Երևանի կառավարումը պիտի լինի կոլեգիալ:
Աջափնյակում ՕԵԿ քարոզարշավին մասնակցեց նաև ՕԵԿ նախընտրական շտաբի ղեկավար Հեղինե Բիշարյանը: Նրա բնութագրմամբ՝ այս քարոզարշավը բավականին լարված է. «Գուցե բնակիչները հոգնում են, երբ տասից ավելի քաղաքական ուժեր թակում են նրանց դռները: Բայց մենք վստահ ենք, որ քաղաքացիները պիտի կարդան ծրագրերը, հետևեն քաղաքական ուժերի անցած հետագծին, ճանապարհին, կատարած աշխատանքին ու հնարավորություններին, կարողություններին և որոշում կայացնեն ու ձայն տալ այն քաղաքական ուժերին, որոնք կարող են Երևանի կյանքում բան փոխել»:
Տաթև ՀԱՐՈՒԹՅՈՒՆՅԱՆ
