Ռուսլան Բոշիրովը և Ալեքսանդր Պետրովը, որոնց Բրիտանիայի իշխանությունները մեղադրում են Սոլսբերիում Ռուսաստանի նախկին լրտես Սերգեյ Սկրիպալի և նրա դստեր թունավորման մեջ, հարցազրույց են տվել Russia Today-ի գլխավոր խմբագիր Մարգարիտա Սիմոնյանին:
Ալեքսանդր Պետրովը և Ռուսլան Բոշիրովը պարզաբանել են, որ մեկնել են Լոնդոն «կտրվելու», բայց հետո որոշել են այցելել նաև Սոլսբերիի տաճար, որի մասին վաղուց լսել էին ընկերներից:
Նրանք պատմել են, որ ցանկանում էին այնտեղ մեկ օր մնալ, բայց ճամփորդությունը ձգձգվել է մինչև երեք օր: Նրանք հիշել են, որ զբոսնել ենք քաղաքով, մտել տաճար, թեյ խմել:
Հարցին՝ արդյոք նրանց մոտ եղել է «Նովիչոկ», պատասխանել են, որ դա «զառանցանք է»: Նրանք հերքել են նաև այն ենթադրությունը, որ իրենց մոտ կանացի օծանելիք է եղել՝ ասելով, որ հիմարություն է, որ «նորմալ տղամարդու մոտ կանացի օծանելիք լինի»: Հարցին՝ ինչու էին նրանք ամենուր միասին, պատասխանել են, որ դա իրենց անձնական գործն է, որի մասին չեն ցանկանում խոսել:
Հարցազրույցի հրապարակումից հետո Մեծ Բրիտանիայի ԱԳՆ-ից հայտնել են, որ դա Ռուսաստանի կողմից իրականացվող հերթական կեղծիքն է:
«Կառավարության համար ակնհայտ է, որ այդ մարդիկ ռուսական ռազմական հետախուզության սպաներ են, և որ նրանք օգտագործել են խիստ թունավոր անօրինական քիմիական զենք մեր երկրի փողոցներում:
Մենք բազմիցս խնդրել ենք Ռուսաստանին բացատրել՝ ինչ է տեղի ունեցել մարտին Սոլսբերիում: Այսօր, ինչպես մենք տեսնում էինք այս ամբողջ ընթացքում, նրանք պատասխանեցին խառնաշփոթով և ստով»,- ասվում է գերատեսչության հաղորդագրության մեջ:
Պատրաստեց՝ Վիկտորյա ԱՆԴՐԵԱՍՅԱՆԸ
