Սեպտեմբերի 23-ին կայանալիք Երեւանի ավագանու ընտրություններին մասնակցող «Լույս» դաշինքի ավագանու թեկնածու, անկուսակցական, կրթության փորձագետ Անահիտ Բախշյանը կարծում է, որ Երեւանի մանկապարտեզները, որոնք ներկայում վճարովի չեն, պետք է վճարովի դառնան կամ մարզերում ևս նախադպրոցական կրթությունը լինի անվճար:
«Հայելի» մամուլի ակումբում այսօր լրագրողների հետ հանդիպմանը նա հիմնավորեց իր տեսակետը եւ նշեց, որ որպես ավագանի՝ այդ ուղղությամբ աշխատելն իր առաջնային անելիքներից է լինելու:
«Ըստ Սահմանադրության՝ պետությունը չունի պարտավորություն՝ նախադպրոցական կրթությունն անվճար ապահովելու, ի տարբերություն հանրակրթության, որն անվճար է օրենքով: Ստացվում է, որ Երեւանն անվճար նախադպրոցական կրթություն է տալիս բնակիչներին, իսկ մարզերում մանկապարտեզները վճարովի են»,-նախ նկատեց Անահիտ Բախշյանը;
Նրա խոսքով՝ Երեւանի մանկապարտեզները պետք է վճարովի դառնան, բայց որոշակի սոցիալական խմբերի համար` արտոնություններով. «Այդ դեպքում սոցիալական արդարությունը հնարավորինս կպահպանվի մարզերի բնակիչների համար եւս: Գուցե իմ այս մտադրության համար ինձ վրա «հարձակվողներ» լինեն, բայց թող հիմնավորեն, նոր հարձակվեն…Ինչո՞ւ պետք է Տավուշի երեխան վճարի, Երեւանի երեխան՝ ոչ: Սա շատ անարդար մոտեցում է: Քանի՜-քանի մանկապարտեզներ փակվեցին մարզերում՝ անվճարունակության պատճառով»:
Անահիտ Բախշյանը նաեւ նշեց, որ կամ պետությունը նախադպրոցական կրթությունը բոլորի համար պետք է դարձնի անվճար, կամ բոլոր մարզերում վճարովի՝ սոցիալական տարբեր խմբերի համար համապատասխան արտոնություններով. իսկ այս պահին Երեւանում երեխաների 57 տոկոսն է միայն նախադպրոցական կրթություն ստանում:
Հիշեցնենք, որ սեպտեմբերի 23-ին կայանալիք Երեւանի ավագանու ընտրություններին «Հանրապետություն» եւ «Լուսավոր Հայաստան» կուսակցությունները մասնակցում են «Լույս» դաշինքով. քաղաքապետի թեկնածուն է արդարադատության ներկայիս նախարար Արտակ Զեյնալյանը:
Լուիզա ՍՈՒՔԻԱՍՅԱՆ
