«Երկիր Ծիրանի» կուսակցությունն այսօր քարոզարշավի շրջանակներում Արաբկիր Վարչական շրջանում էր:
Կուսակցության նախագահ, Երևանի քաղաքապետի թեկնածու Զարուհի Փոստանջյանն իր համախոհների հետ եղավ «Կարմիր բլուրի» բարձունքում:
Հնավայրից նա հայտարարեց. «Այստեղից՝ այս բարձունքից, մենք նայում ենք դեպի Արարատ և դեպի Արագած. տեսանելի են մեր երկու հզորությունները, որոնք մեզ հզորություն են տալիս: Այդ հզորությունը, որ ստանում ենք Արարատից ու Արագածից, փոխանցելու ենք Երևանի ապագա շինարարությանն ու կառուցմանը»:
«Երկիր Ծիրանի»-ի անդամները խոստացան, եթե հաղթանակ գրանցեն ու լիազորություններ ստանձնեն, Կարմիր բլուրը դառնալու է կրթական, մշակութային և զբոսաշրջային կենտրոն:
Զարուհի Փոստանջյանն անդրադառնալով դեպի Եռաբլուր բացվող տեսարանին, ասաց. «Մեր թիկունքում է Եռաբլուրը, որտեղ հանգչում են մեր մեծերը՝ Զորավար Անդրանիկի գլխավորությամբ, որոնց պայքարով ազատագրվեց Հայաստանը: Բայց առջևում ունենք դեռ մեծ կռիվ ու մեծ ազատագրում»:
Քաղաքապետի թեկնածուն նաև ընտրողների ուշադրությունը հրավիրեց Շենգավիթ վարչական շրջանից Հրազդանի կիրճ բացվող տեսարանին. «Տեսնում եք՝ ինչպես է աղտոտված Հրազդանի կիրճը, այդտեղ աղբի կուտակումներ կան: Իհարկե, լիազորություններ ստանձնելով՝ նաև այս աղբակույտերն ու աղբավայրերը պիտի վերացնենք»:
Տաթև ՀԱՐՈՒԹՅՈՒՆՅԱՆ
