Ամփոփելով երկօրյա այցը Հայաստան՝ ԵԱՀԿ ԽՎ նախագահ Գեորգի Ծերեթելին ողջունել է երկրում ընտրական բարեփոխումների իրականացմանն ուղղված ջանքերը՝ կոչ անելով ընտրական համակարգում ցանկացած փոփոխության հարցում լայն քաղաքական փոխհամաձայնության: Նա վերահաստատել է ԵԱՀԿ-ի և Խորհրդարանական վեհաժողովի հանձնառությունները՝ պաշտպանել Հայաստանում շարունակվող ժողովրդավարական զարգացումները:
ԵԱՀԿ ԽՎ նախագահ Ծերեթելին և գլխավոր քարտուղար Ռոբերտո Մոնտելլան հանդիպել են Հայաստանի նախագահ Արմեն Սարգսյանի, ԱԺ խոսնակ Արա Բաբլոյանի, արտգործնախարար Զոհրաբ Մնացականյանին և խորհրդարանական առաջնորդների, քաղհասարակության ներկայացուցիչների, միջազգային հանրության անդամների, ինչպես նաև ԵՊՀ ուսանողների հետ:
«Այս տարի ավելի վաղ Հայաստանի կառավարության դրամատիկ փոփոխություններից հետո Հայաստանի քաղաքական համակարգի առաջ նոր առաջադրանք է դրված: Ես ուրախ եմ տեսնելու քաղաքական ուժերի պատրաստակամությունը աշխատելու միասին կառուցողական մթնոլորտում, ինչպես նաև ընտրական գործընթացների համաչափ բարեփոխումները, իսկ լայն փոխզիջումը կրկնակի կարևոր է,- ասել է Ծերեթելին:- Այս գործընթացի համար պատասխանատվությունն ընկած է Հայաստանի իշխանությունների և ժողովրդի վրա, և ԵԱՀԿ-ն ու ԽՎ-ն հավատարիմ են մնում՝ աջակցելու հանուն հնարավոր լավագույն արդյունքների գործընթացին»:
Պաշտոնյաների հետ հանդիպմանը Ծերեթելին քննարկել է մի շարք հարցեր, որոնք առնչվում են տնտեսական զարգացումներին, ընտրական բարեփոխումներին, հակակոռուպցիոն ջանքերին և ԵԱՀԿ շրջանակում Հայաստանի ջանքերին: Նա նաև ԵԱՀԿ ԽՎ աջակցությունն է հայտնել ԵԱՀԿ Մինսկի խմբին և նրա համանախագահներին, բայց նաև ընդգծել է, որ Լեռնային Ղարաբաղի հարցում հստակ արդյունքների և առաջընթացի վերջնական պատասխանատվությունն ընկած է քաղաքական ղեկավարության վրա:
«Ինքս էլ լինելով Հարավային Կովկասից՝ ես հասկանում եմ այն մարտահրավերներն ու զգայունությունը, որոնք ազդում են Հայաստանի վրա: Ես հույս ունեմ, որ իշխանությունները կօգտագործեն ԵԱՀԿ-ի կողմից առաջարկվող ողջ գործիքակազմը՝ օգնելու երկրին լիարժեք կերպով արդարացնելու իր ժողովրդի սպասումները»,- ասել է Ծերեթելին:
Պատրաստեց՝ Վիկտորյա ԱՆԴՐԵԱՍՅԱՆԸ
