«Լուրեր են տարածվում, թե ընտրություններից հետո «Լույս» դաշինքն իր ձայներն ինչ-որ մեկին պետք է տա: Տխմար զրույցներ են դրանք»,-«Հայելի» մամուլի ակումբում այսօր հայտարարեց «Լույս» դաշինքի ավագանու թեկնածու, անկուսակցական, կրթության փորձագետ Անահիտ Բախշյանը: Նա կոչ հղեց ընտրողներին. «Ժողովուրդ ջան, «Լույսն» ունի իր դեմքը, առանցքը, սկզբունքները եւ դրանցով է ներկայանալու ավագանիում՝ որպես «Լույս» դաշինք: «Լույսը» մնալու է որպես «Լույս» դաշինք՝ ավագանու թիմում»:
Հիշեցնենք, որ սեպտեմբերի 23-ին կայանալիք Երեւանի ավագանու ընտրություններին «Հանրապետություն» եւ «Լուսավոր Հայաստան» կուսակցությունները մասնակցում են «Լույս» դաշինքով. քաղաքապետի թեկնածուն է Արդարադատության ներկայիս նախարար Արտակ Զեյնալյանը:
Անահիտ Բախշյանն անդրադարձավ վարչապետ Նիկոլ Փաշինյանի այն հայտարարությանը, որ իրենց հեղափոխության սատարող ներկայացնող որոշ քաղաքական ուժեր թաքուն բանակցում են ՀՀԿ-ի հետ՝ ավագանու ընտրություններում ընտրակեղծարարության մեխանիզմներ ունենալու նպատակով: Անահիտ Բախշյանը նշեց. «Չգիտեմ՝ որքանո՞վ էր այդ հայտարարությունն ուղղված մեզ, բայց Արամ Սարգսյանը երեկ պատասխանեց դրան: Նման հայտարարությունները չեն սազում մեր վարչապետին: Նա ուժեղ վարչապետ է, որը չպետք է վրիպի»:
Ապա Անահիտ Բախշյանը հիշեցրեց Նիկոլ Փաշինյանի «Երկրի հակառակ կողմը» գրքի «Հեղափոխականի մահը» գլխի բովանդակությունը, որտեղ նա ասում է՝ «հեղափոխականի գերագույն նպատակը պետք է լինի՝ չկրկնել այն սխալները, որոնց դեմ նա պայքարել է»: Տիկին Բախշյանն ընդգծեց. «Նա տասը տարի առաջ է դա գրել, մենք էլ՝ անընդհատ հիշեցնենք նրան այդ մասին, որովհետեւ լսում ենք «սեւ եւ սպիտակ» եւ «մեր դեմ խաղ չկա» արտահայտությունները»:
Լուիզա ՍՈՒՔԻԱՍՅԱՆ
