Հայաստանում թավշյա հեղափոխությունից հետո վարչապետ Նիկոլ Փաշինյանի դիմապատկերով շապիկներն ու գլխարկները կայծակնային արագությամբ տարածվեցին: Փաշինյանի դիմապատկերն ու «Դուխով»-ը հեղափոխության խորհրդանիշ դարձան: Երբ Ազգային անվտանգության ծառայությունը մեկը մյուսի հետեւից աղմկահարույց բացահայտումներ էր անում, ԱԱԾ-ի հանդեպ հանրության վստահությունը կտրուկ բարձրացավ, ԱԱԾ-ն եւս դարձավ խորհրդանիշ: Վերնիսաժում ԱԱԾ գրառմամբ շապիկներ ու գլխարկներ են վաճառվում, բայց այլ հարց է՝ թույլատրելի՞ է շարքային քաղաքացուն կրել դրանք:
Երեկ ԱԱԾ տնօրենի եւ ՀՔԾ պետի հեռախոսային զրույցի գաղտնալսված ձայնագրությունը հրապարակվեց, որից հետո հանրության շրջանում կասկածներ ու մտահոգություն առաջացան ԱԱԾ-ի աշխատանքի շուրջ: Այդ ձայնագրության հրապարակմամբ փորձ էր արվում վարկաբեկել ԱԱԾ-ին:
ԱԱԾ-ի եւ ՀՔԾ-ի ղեկավարները երեկ հայտարարեցին՝ իրենք տիրապետում են այնպիսի տեղեկությունների ու փաստերի, որ ոմանք փորձում են իրենց թուլացնել, վախեցնել, որպեսզի գործը կիսատ թողնեն: Խոսքը Մարտի 1-ի բացահայտման մասին է, եւ ոչ միայն: Այս կառույցների ղեկավարների երեկվա բացահայտումներն իսկական «հակահարված էին»: Վանեցյանն ասաց՝ քրեական գործ է հարուցվել Ռոբերտ Քոչարյանի դեմ ՝ փողերի լվացման մեղադրանքով. «Խոսքը հարյուրավոր միլիոն դոլարների մասին է»:
Մարտի 1-ի գործով ՀՔԾ պետն էլ կարեւոր հայտարարություն արեց. «Ներքին զորքերի զինծառայող Տիգրան Աբգարյանը սպանվել է հատուկջոկատայինների կողմից»:
Լուսանկարը՝ ՆԵԼԼԻ ԲԱԲԱՅԱՆԻ
«Առավոտ»
12.09.2018
