«Եթե կարծում եք, որ Արտակ Զեյնալյանի` քաղաքապետ ընտրվելու դեպքում այդ փաստը կխթանի այն գործընթացը, որ Ռոբերտ Քոչարյանը չդատվի, ապա ասեմ, որ սխալվում եք: Ռոբերտ Քոչարյանը չդատվելու խնդիր ունի միայն»,-«Լույս» դաշինքի նախընտրական հավաքում այսօր հայտարարեց «Հանրապետություն« կուսակցության նախագահ Արամ Սարգսյանը:
Հիշեցնենք, որ սեպտեմբերի 23-ին կայանալիք Երեւանի ավագանու ընտրություններին «Հանրապետություն» եւ «Լուսավոր Հայաստան» կուսակցությունները մասնակցում են «Լույս» դաշինքով. քաղաքապետի թեկնածուն է Արդարադատության ներկայիս նախարար Արտակ Զեյնալյանը:
Սարգսյանն անդրադարձավ կարծիքներին, թե Զեյնալյանի՝ քաղաքապետ դառնալու պարագայում նպաստավոր պայմաններ կստեղծվեն Ռոբերտ Քոչարյանի՝ քաղաքականություն վերադառնալու համար. «Զեյնալյանի՝ քաղաքապետ ընտրվելու դեպքում հակահեղափոխության վտանգ չկա: Դրանով Ռոբերտ Քոչարյանի՝ քաղաքականություն վերադարձը չի արագանա»:
Ինչ վերաբերում է ԱԱԾ եւ ՀՔԾ պետերի աղմկահարույց խոսակցության գաղտնազերծմանը՝ Արամ Սարգսյանը համոզմունք հայտնեց, որ հեղինակները պետք է պատժվեն. «Կարծում եմ՝ ԱԱԾ-ն պետք է մտածի վարչապետի եւ Պաշտպանության նախարարի անվտանգությունն ապահովելու ուղղությամբ»:
Լուիզա ՍՈՒՔԻԱՍՅԱՆ
