«Մենք շարունակելու ենք սատարել կոռուպցիայի դեմ պայքարին, այն դրական բաներին, որ երկիրը պիտի մաքրվի»,- Մերգելյանի հրապարակում ամփոփիչ հանրահավաքին հայտարարեց «Օրինաց երկիր» կուսակցության Երևանի քաղաքապետի թեկնածու Մհեր Շահգելդյանը:
«Օրինաց երկիր» կուսակցությունը քարոզարշավի շրջանակներում այսօր քայլարշավ անցկացրեց Արաբկիր վարչական շրջանում, որին հաջորդեց ամփոփիչ հանրահավաքը:
Մհեր Շահգելդյանն արաբկիրցիներին կոչ արեց ընտրել ՕԵԿ ավագանու թեկնածուներին, նրանցից էլ հետագայում պահանջել:
Քաղաքապետի թեկնածուն շեշտեց՝ հեղափոխությունից հետո Երևանի ավագանու ընտրություններն առաջինն են ու հույս հայտնեց. «Մինչև այժմ անցկացված ընտրություններում չի արտահայտվել ժողովրդի ձայնը: Այսօր այդ հնարավորությունը կա, և ուզում եմ իմ վստահությունն արտահայտել, որ ընտրությունները կանցնեն մաքուր, մարդիկ կքվեարկեն՝ գնահատելով ծրագրերը»:
Մհեր Շահգելդյանը, ինչպես յուրաքանչյուր հանդիպման ժամանակ, շեշտեց՝ աղբահանությունը լավ չի կազմակերպվում Երևանում: Այնուհետև հայտարարեց. «Կներեք՝ որտեղ մտնում ենք զիբիլանոց է դարձել»: Այնուհետև բարձրացրեց սոցիալական, համայնքային բնակարանաշինության անհրաժեշտության հարցը:
Քաղաքի ցեմենտ-բետոն-ասֆալտից ու քիչ կանաչ տարածքներից ևս դժգոհեց Մհեր Շահգելդյանը ու մտահոգություն հայտնեց, որ այդ պատճառով Երևանի կենտրոնում երեխաների թոքային հիվանդությունները շատացել են:
Ելույթներով հանդես եկան նաև ՕԵԿ ավագանու թեկնածուները: Ավագանու թեկնածու Ալեքսեյ Ներսիսյանը հայտարարեց. «Ինձ համար ավագանին մեծ պատասխանատվություն է: Ավագանին պետք է ծառայի իր համայնքի բնակչությանը և լուծի խնդիրներ»:
Եզրափակելով խոսքը Մհեր Շահգելդյանը հավաստիացրեց՝ ՕԵԿ-ը սատարել է հեղափոխությանը, քանի որ ուզում էին իրական հեղափոխություն, ոչ թե իմիտացիոն. «Ուզում էինք, որ Հայաստանը ժողովրդավար երկիր դառնա: Մենք շարունակելու ենք սատարել կոռուպցիայի դեմ պայքարին, այն դրական բաներին, որ երկիրը պիտի մաքրվի: Դրա հետ միասին մենք մեր տեսակետն ենք պահպանում, չենք նույնանում և մեր մոտեցումներով գնալու ենք առաջ՝ շարունակելով սատարել հեղափոխության գաղափարախոսությանը»:
Տաթև ՀԱՐՈՒԹՅՈՒՆՅԱՆ
