2016թ. ՀՀ ոստիկանության ՊՊԾ գունդը գրաված եւ մի շարք ծանր հանցագործությունների կատարման համար մեղադրվող «Սասնա ծռեր» զինված խմբի անդամների գործով հերթական դատական նիստին այսօր եկել էր նաեւ ՊՊԾ գնդի գրավման օրերին սպանված ոստիկաններից Յուրի Տեփանոսյանի (նրա սպանության համար մեղադրվում է խմբի անդամներից Սմբատ Բարսեղյանը) հայրը՝ Վահրամ Տեփանոսյանը: Նրա ներկայությունն անհրաժեշտ էր, քանի որ ներգրավվեց որպես դատարանում որդու իրավահաջորդ: Նախկինում Յուրի Տեփանոսյանի մայրն էր գործում հանդես գալիս որպես տուժողի իրավահաջորդ: Վահան Տեփանոսյանը դատավորին տեղեկացրեց. «Կցանկանայի, որ իմ շահերը ներկայացնի Արայիկ Պապիկյանը»: Նշենք, որ Արայիկ Պապիկյանը գործով մեղադրյալներ Վարուժան Ավետիսյանի եւ Արայիկ Խանդոյանի շահերի պաշտպանն է, ուստի կողմերի համար Տեփանոսյանի պահանջը սպասելի չէր:
Դատավոր Մեսրոպ Մակյանը հայտարարեց՝ Արայիկ Պապիկյանը չի կարող պաշտպանել Տեփանոսյանների շահերը, քանի որ ամբաստանյալների փաստաբանն է, եւ շահերի բախման խնդիր է առաջանում: Վարուժան Ավետիսյանն ու Արայիկ Խանդոյանն էլ, լսելով Վահրամ Տեփանոսյանի պահանջը, հրաժարվեցին Արայիկ Պապիկյանի ծառայություններից: Դատավորը որոշեց, որ նա չպետք է կրկին ներգրավվի գործում՝ անգամ որպես Տեփանոսյանների շահերի ներկայացուցիչ: Այսպիսով, Արայիկ Պապիկյանը հեռացվեց այս գործի վարույթից:
Նշենք, որ նա «Սասնա ծռերի» մեկ այլ գործով եւս (գործը քննվում է երեք առանձին վարույթներով) ամբաստանյալների պաշտպան է հանդիսանում եւ այս դատավարության մեկնարկից պաշտպանել է մի շարք ամբաստանյալների շահերը:
Լուիզա ՍՈՒՔԻԱՍՅԱՆ
Լուսանկարում՝ Արայիկ Խանդոյանն ու Սեդրակ Նազարյանը
