Այսօր ՀՔԾ պետ Սասուն Խաչատրյանը, որը գաղտնալսումների հետ կապված ԱԱԾ պետի հետ ասուլիս էր հրավիրել, ուշագրավ հայտարարություն արեց՝ Մարտի 1-ի գործի հետ կապված. «Բոլորդ տեղյակ եք, որ Ներքին զորքերի զինծառայող Տիգրան Աբգարյանի մահվան հանգամանքները առավել քան մշուշոտ են: Այս ուղղությամբ մենք բավականին աշխատանք ենք արել ու այսօր կարող ենք վստահությամբ ասել, որ Տիգրան Աբգարյանը սպանվել է հատուկ ջոկատայինների կողմից: Այդ մասին ունենք հստակ ապացույցներ: Սա ինչի մասին է խոսում, նա սպանվել է այն ժամանակ, երբ արդեն իսկ մտցրել էր Քոչարյանն արտակարգ դրություն, սակայն որեւէ հրազենային վիրավորում ստացած զինծառայող չկար:
Մեր վերսիան հետեւյալն էր, որ Տիգրան Աբգարյանին հրազենային վիրավորում էր ստացել նրան համար, որ Քոչարյանի՝ մենք արդեն իսկ զոհեր ունենք ասածը հիմնավորվի: Դա նախաքննությամբ հիմնավորվել է: Այս նորությունը արդեն իսկ բավարար է, որ մեր դեմ՝ իմ եւ պարոն Վանեցյանի դեմ իսկական որս սկսեր: Դրա համար չէինք հրապարակում այս տվյալները: Շատ է խոսվում օլիգարխների թիկնազորին բաճկոններ բաժանելու մասին: Քրգործով արդեն իսկ ձեռք են բերվել ապացույցներ, որ դա իրականություն է, որ ՊՆ պահեստից ստացվել են մեծ քանակությամբ զինվորական հագուստներ, որոնք բաժանվել են օլիգարխների թիկնազորներին: Ում են բաժանվել՝ չեմ ասի այս պահին, ինչի համար են բաժանվել՝ դուք գիտեք, որ զինծառայողներից չտարբերվեն եւ պրովոկացիաներ արվեն»:
Սասուն Խաչատրյանն ասաց, որ Մարտի 1-ի գործը նորից պետք է սկսեն քննել, որովհետեւ նախկին իշխանության օրոք նախաքննության ձեռք բերած տվյալները կասկածելի են,. նա ասաց, որ զրոյից պետք է սկսեն աշխատել:
Լրագրողները հետաքրքրվեցին, թե Սերժ Սարգսյանին, Լեւոն Տեր-Պետրոսյանին չե՞ն հարցաքննելու՝ Սասուն Խաչատրյանը պատասխանեց, որ եթե նպատակահարմար գտնեն՝ կկանչեն, թե ինչ կարգավիճակով՝ չի կարող ասել:
Հռիփսիմե ՋԵԲԵՋՅԱՆ
