«Երեւանի կառավարումը պետք է լինի կոլեգիալ, այսինքն՝ ավագանիների որոշումները պետք է շատ ավելի լայն լինեն եւ նրանք պետք է ունենան մեծ իրավասություններ»,-այսօր նախընտրական քարոզարշավի ժամանակ ասաց «Օրինաց երկիր» կուսակցության ավագանու ընտրություններում ընտրական ցուցակը գլխավորող կուսակցության փոխնախագահ Մհեր Շահգելդյանը:
ՕԵԿ-ն իր քարոզարշավը մեկնարկեց քայլերթով, ապա Մոսկվա կինոթատրոնի հարեւանությամբ հանրահավաք անցկացրեց՝ ներկայացնելու ծրագրերը: Պարոն Շահգելդյանն ասաց, որ իրենց համար սկզբունքային հարցերից է լինելու ֆինանսական թափանցիկությունը:
Նրա խոսքով, ՕԵԿ-ի ծրագիրը մշակվել է հաշվի առնելով արտասահմանի փորձը, Երեւանի հիմնախնդիրները եւ հասարակական կազմակերպությունների, փորձագետների հմտություններն ու առաջարկները:
Մհեր Շահգելդյանը կարեւորեց բնակարանաշինության հարցը. «Այսօր երիտասարդների մեծ մասը ձգտում է Երեւան, բայց մարդիկ չունեն բնակարաններ, բայց դրա հետ մեկտեղ Կենտրոնը խեղդվում է բարձրահարկ շենքերի կառուցմամբ: Մենք առաջարկում ենք սոցիալական բնակարանաշինություն»:
Նա թվարկեց բոլոր այն կենտրոնական փողոցները, որոնք խիտ կառուցապատում ունեն, մինչդեռ ծայրամասերում դատարկություն է:
«Պետք է վերացվեն անօրինական շինությունները Երեւանի կենտրոնում, որոնք անմիջականորեն սպառնում են մեր քաղաքացիների շահերին: Հյուսիսային պողոտայի, Կոզեռնի, Ալավերդյանի վրա խնդիրներ կան, քաղաքացին չպետք է տուժի, վերջիվերջո շինարարությունը պետք է լինի այլ թաղամասերում էլ, այնտեղ էլ են մարդիկ ապրում նրանք կարիք ունեն կանաչ ճարտարապետություն պետք է լինի»,-ասաց պարոն Շահգելդյանը: Ըստ նրա, կարեւոր հարցերից են ենթակառուցվածքները:
Նա նաեւ ասաց, որ պայքարի ելած քաղաքական ուժերին հարգում են եւ փոխադարձ հարգանքի ու պատկառանքի վրա պետք է կառուցել քարոզարշավը:
Ավագանու մյուս անդամները նշեցին, որ իրենց պայքարը լինելու է առանց չարախոսությունների ու բամբասանքների:
Լուսինե ԲՈՒԴԱՂՅԱՆ
