«Մարտի 1-ը պետք է բացահայտվի»,-«Օրինաց երկիր» կուսակցության նախընտրական հավաքում այսօր հայտարարեց կուսակցության նախագահ Արթուր Բաղդասարյանը:
Լրագրողների հետ զրույցում անդրադառնալով Մարտի 1-ի գործի բացահայտմանը եւ այդ իրադարձությունների շրջանակում իր հասցեին հնչող քննադատություններին՝ նա նշեց. «Մեզ չեն կարող մեղադրել արյան կամ թալանի մեջ: Մենք կոալիցիա (նկատի ունի՝ ՀՀԿ-ի հետ) էինք կազմել ոչ թե մարտի 1-ին, այլ 21-ին: Ես անվտանգության խորհրդի քարտուղար եմ նշանակվել մայիսի 5-ին: Մարտի 1-ն ուր, մայիսի 5-ը՝ ուր…»:
Ըստ Արթուր Բաղդասարյանի՝ Մարտի 1-ի ենթատեքստում իր դեմ տեւական ժամանակ սև քարոզչություն է արվել. «Մինչդեռ մենք եղել ենք Մարտի 1-ի հարցով հանձնաժողով կազմելու նախաձեռնողը: Ներկայումս էլ ողջունում ենք Մարտի 1-ի լիակատար բացահայտմանն ուղղված գործընթացը»:
Ինչ վերաբերում է Մարտի 1-ի գործով մեղադրյալ Ռոբերտ Քոչարյանին, Արթուր Բաղդասարյանը համոզմունք հայտնեց, որ նրա հանդեպ գործընթացն իրավական հարթության վրա է. «Դա պետք է կայանա օրենքի շրջանակում»:
Լուիզա ՍՈՒՔԻԱՍՅԱՆ
