«Բոլոր նախագահների, վարչապետների ժամանակ ստուգել են, ես չեմ խուսափում: Ասել եմ` թող գան ստուգեն, ամեն օր են ստուգում: Եթե մենք մաքուր ենք, ինչ մտածելու բան ունենք»,- այսօր լրագրողների հետ զրույցում ասաց ԲՀԿ նախագահ Գագիկ Ծառուկյանը`պատասխանելով հարցին` համապատասխանո՞ւմ է իրականությանը տեղեկությունը, որ հարկային մարմինների աշխատակիցներ ներկայացած դիմակավորված անձինք երեկ ներխուժել են ձեր ընկերություններ եւ ստուգումներ են իրականացրել:
Գագիկ Ծառուկյանը հավաստիացրեց`իր բիզնեսներում ստուգումները չեն կարող առիթ հանդիսանալ, որ ԲՀԿ-ն լքի ժամանակավոր կառավարությունը: «Այստեղ արտոնյալներ, արտոնություն ունեցողներ չկան: Մենք մաքուր ենք, ինչի՞ց պիտի վախենանք։ Ես ասել եմ` առաջինը իմ մոտ եկեք, ստուգեք»,- շարունակեց Գագիկ Ծառուկյանը:
Լրագրողներից մեկն էլ հետաքրքրվեց` ինչպես կվերաբերվի Գագիկ Ծառուկյանը, եթե ապացուցվի, որ իր խնամին`նախկին վարչապետ Հովիկ Աբրահամյանն առնչություն ունի մարտի 1-ի դեպքերի հետ: Գագիկ Ծառուկյանը պատասխանեց. «Ինչպես ես արդեն ասել եմ, եթե կապ ունեմ`ինձ մասսայական գնդակահարեքի, Հովիկ Աբրահամյանն էլ պատրաստ է մասսայական գնդկահարվել»։
Այլ մանրամասները` տեսանյութում
Այսօր Գագիկ Ծառուկյանին պատկանող «Փարավոն» համալիրում ԲՀԿ-ն «Կայուն եւ հարմարավետ քաղաքներ» կոնֆերանս էր հրավիրել, որին ներկա էին մոտ չորս տասնյակ քաղաքապետեր`աշխարհի տարբեր երկրներից: Քննարկում էին համայնքային կառավարմանը վերաբերվող հարցեր:
Միջոցառմանը ներկա էր նաեւ «Ծառուկյան» խմբակցության պատգամավոր, ՀՀՇ վարչության նախագահ, Երեւանի ավագանու արտահերթ ընտրություններում «Երեւանցիներ» դաշինքի ցուցակը գլխավորող Արարատ Զուրաբյանը: Գագիկ Ծառուկյանն ասաց`թե Նաիրա Զոհրաբյանի, թե Արարատ Զուրաբյանի հաղթանակի դեպքում հաղթանակն իրենցն է:
Ի դեպ, Գագիկ Ծառուկյանն այսօր սպիտակ հագուստով էր: Դիտարկմանն ի պատասխան`դա կապ ունի՞ «Քաղաքացիական պայմանագրի» ցուցակը գլխավորող Հայկ Մարությանի սեւերի եւ սպիտակների հայտարարության հետ, Գագիկ Ծառուկյանն ասաց, որ ինքը ժողովրդի գույնին է:
Նելլի ԳՐԻԳՈՐՅԱՆ
