Ինչպես ավելի վաղ հայտնել էինք, ֆոտոխմբագրման PicsArt հայկական ընկերության գրասենյակ էր այսօր այցելել ՀՀ նախագահ Արմեն Սարգսյանը: Նա արձագանքեց լրագրողների մի շարք հարցադրումների:
-Դուք ժամանակ կգտնեի՞ք նման ծրագրերը փորփրելու, ինչպես երիտասարդներն են սիրում անել:
-Ի՞նչ է, ես երիտասարդ չեմ,-ժպտալով պատասխանեց նախագահը:
-Դե, մեծահասակներն են հիմնականում երիտասարդներիս ասում, որ թիթիզ ծրագրերով ենք տարված:
-Կարծում եմ՝ դա ավագ եւ երիտասարդ սերունդների միջեւ ժամանակի, ապրելակերպի եւ ճաշակի հարց է: Երբ ես քսան տարեկան էի, ԽՍՀՄ-ում որոշ երիտասարդներ մազերը երկարացնում էին՝ ի նշան բողոքի: Կամ, ԵՊՀ քսան աղջիկներ «հեղափոխություն» էին արել եւ բուհ եկել կարճ շրջազգեստներով…մեկ տարի անց այդ նույն աղջիկները ցույց արեցին երկար շրջազգեստներով, հետո՝ տաբատներով: այսինքն, 1970-ականներին էլ հեղափոխականներ կային, միայն այսօր չէ, որ նրանք կան»:
-Դուք ձեր հեռախոսում նման ծրագրեր ունե՞ք:
-Իհարկե…Ժամանակին զբաղվել եմ համակարգչային ծրագրավորմամբ եւ խաղեր հեղինակել: Բայց «ֆեյսբուք» չունեմ: Եթե ուզում եք՝ էջ կբացեմ, բայց չի կարելի դա անել, եթե հետո դրանով զբաղվելու ժամանակ չես ունենալու…Մեզ համար համակարգչային խաղեր ծրագրավորելը հոբբի էր, բայց այն ժամանակ չկային ներկայիս տեխնոլոգիաները: 1985թ.-ին, երբ եկա Մեծ Բրիտանիայից, բերեցի անձնական համակարգիչ՝ personal computer, որն առաջինն էր ողջ Հայաստանում: Անգամ այդ ժամանակվա վարչապետ Ֆադեյ Սարգսյանն էր մեր տուն գալիս՝ այդ «հրաշքը» տեսնելու»:
https://www.facebook.com/aravot.am/videos/235746447091960/
Լուիզա ՍՈՒՔԻԱՍՅԱՆ
