Հայկ Սարգսյանի գործով դատարանն արդեն ակնհայտ կաշկանդվածություն ցույց տվեց. Երեմ Սարգսյան

Ինչպես արդեն տեղեկացրել ենք, Երևանի ընդհանուր իրավասության դատարանի Շենգավիթի նստավայրում ընթանում է Սաշիկ Սարգսյանի որդու՝ Հայկ Սարգսյանի կալանքի վերաբերյալ նախնական դատական նիստը:

Նախագահող դատավոր Աննա Դարբինյանը նախ հարցեր հղեց Հայկ Սարգսյանին ծննդավայրի, ազգության, ընտանեկան կարգավիճակի, կրթության մասին: Դատավորի հարցին՝ առողջական խնդիրներ ունեք, Հայկ Սարգսյանը պատասխանեց՝ունեմ: Մյուս հարցին՝ի՞նչ խնդիրներ, Հայկ Սարգսյանը պատասխանեց՝բարձրաձայն ասել չեմ կարող:

Այնուհետև Հայկ Սարգսյանի պաշտպան Երեմ Սարգսյանը հինգ րոպե ժամանակ խնդրեց գործի նյութերին ծանոթանալու համար:

Հետո միջնորդությամբ հանդես եկավ, որպեսզի դատարանը դիմի վարույթն իրականացնող մարմնին և պահանջի փաստաթղթերի պատճենների հավաստիությունը:

Այս առիթով Երեմ Սարգսյանը հայտարարեց. «Քրեական գործի նյութերի ուսումնասիրությունը ցույց է տալիս, որ դրանք իրավական ուժ ունենալ չեն կարող, դրանցից շատերը պատճեններ են»:

Պաշտպանի կողմից ներկայացված միջնորդությունը դատարանը թողեց առանց քննության:

Երեմ Սարգսյանն այս առիթով հայտարարեց. «Դատարանն ակնհայտ կաշկանդվածություն ցույց տվեց արդեն և հստակ ցույց տվեց, որ միտված չէ արդար դատաքննություն իրականացնելու»:

Այնուհետև Երեմ Սարգսյանը հայտարարեց, որ այս գործում դատարանն ու դատախազն ունեն կաշկանդվածություն. «Պետական որոշ մարմինների մասնակցությամբ ՀՀ ոստիկանության, քննչական կոմիտեի և ՀՀ դատախազության անձինք Հայկ Սարգսյանի վերաբերյալ գործով անտեսել են գործող օրենքները, խախտել տարրական իրավական նորմերը: Նրանց նպատակն է ապօրինի միջոցներով հասնել իրենց առաջ դրված խնդիրներին, որ դեռ 2007-ին կարճված քննությունը վերսկսվի, Հայկ Սարգսյանը կալանավորվի և հետո դատապարտվի: Պետական որոշ մարմիններ ակնհայտորեն մրցակցության մեջ են մտել, թե ով ավելի հնչեղ բացահայտումներ կանի և ավելի հնչեղ անուններ կհնչեցնի, միայն թե տպավորություն ստեղծվի, թե անզիջում պայքար են մղում: Պետական մարմինն այս պահի խնդիր է լուծում: Նախ իրականացվել է միակողմանի նախաքննություն՝ Հայկ Սարգսյանին քրեական պատասխանատվության ենթարկելու միակ նպատակով: Այս ամենը կատարվել է դատախազ Աբգար Առաքելյանի թողտվությամբ: Այս գործը ամբողջությամբ անօրինական է»:

Նշենք, որ դատարանի դահլիճում մեր կողքին էին նստած Հայկ Սարգսյանի որոշ հարազատներ: Նրանցից մեկը պաշտպանի հայտարարության ժամանակ ռեպլիկի կարգով նշեց՝ անարխիա:

Տաթև ՀԱՐՈՒԹՅՈՒՆՅԱՆ