Սկրիպալների գործի հետեւանքով ԱՄՆ-ի՝ Ռուսաստանի դեմ սահմանած նոր պատժամիջոցները (նոյեմբերին սպասվում է նոր ալիք) պարտադիր չէ, որ բացասաբար ազդեն Ռուսաստանի եւ նրա գործընկերների տնտեսության վրա: Նման համոզմունք ունի ռուսաստանցի տնտեսագետ Իգոր Կովալյովը:
«Սպուտնիկ Արմենիա» մամուլի կենտրոնում այսօր լրագրողների հետ տեսակապով զրույցում նա նշեց. «Եվրասիական տնտեսական միությունը կայանում է՝ ի պատասխան այդ պատժամիջոցների, որովհետեւ պատժամիջոցների ենթարկվող երկրներն այլընտրանքային շուկաներ եւ ներդրումներ են փնտրում: Իհարկե, եղբայրական երկրների հետ տնտեսական միություն ունենալը բնական եւ խելամիտ պատասխան է պատժամիջոցային ճնշմանը, որին այժմ ենթարկվում է Ռուսաստանը»:
Կովալյովի խոսքով՝ դեռ չկան հիմնավոր պատճառներ ասելու, թե ՌԴ-ում տնտեսական ճգնաժամ է. «Մենք սովոր ենք դիմակայել նման պատժամիջոցներին: Շնորհիվ դրանց՝ զարգացրել ենք գյուղատնտեսությունը: Այժմ ակտիվ աշխատում ենք ոչ միայն ԵՏՄ երկրների, այլեւ Թուրքիայի եւ Իրանի հետ»: Թե ինչպիսին կլինեն պատժամիջոցների հետեւանքները՝ Ռուսաստանում գործող հայկական ձեռնարկությունների, օրինակ՝ «Արմենալ»-ի (մաս է կազմում ալյումին արտահանող ռուսական ձեռնարկության) պարագայում, փորձագետը դժվարացավ ասել, փոխարենը շեշտեց. «Նման պատժամիջոցների պարագայում է միայն, որ ԵՏՄ երկրները հարցերը սկսում են քննարկել միասին: Գործընկերների կարծիքը հաշվի է առնվում, ի տարբերություն մասնավոր հարցերի: ԵՏՄ փորձը ցույց է տալիս, որ պատժամիջոցներն անհաղթահարելի չեն»:
ԵՏՄ անդամ Հայաստանի վերաբերյալ էլ Իգոր Կովալյովն ընդգծեց. «Մենք լուրջ ռազմական գործակցություն ունենք: Շատ փորձագետներ կարծում են, որ հենց ռազմատեխնիկական գործակցությունն է հայ-ռուսական հարաբերությունների առանցքային գործոնը, որը մտերմացնում է երկու երկրներին եւ նոր ծրագրերի հիմք տալիս»:
Լուիզա ՍՈՒՔԻԱՍՅԱՆ
