«Մայմեխ Սկի Ռեզորթ» ՓԲԸ տնօրեն Մհեր Բաղդասարյանն անդրադարձել է օրեր առաջ Լոռվա մարզի Անտառաշեն գյուղի բնակիչների հետ ՀՀ Տարածքային կառավարման և զարգացման նախարար Սուրեն Պապիկյանի հանդիպման ընթացքում լեռնադահուկային ներդրումային ծրագրին առնչվող հարցերի քննարկմանը՝ մասնավորապես նշելով, որ տեղեկացված չեն եղել հանդիպման մասին, որպեսզի իրենք էլ ներկա լինեն և տեղում ներկայացնեն իրենց տեսանկյունը: Լրատվականների անդրադարձը նույնպես ներկայացվել է առանց «Մայմեխ Սկի Ռեզորթ» ՓԲԸ-ի տեսակետի:
Պարոն Բաղդասարյանը մասնավորապես նշեց, որ համայնքի բնակիչների հետ հանդիպել են մի քանի անգամ, քննարկել նախագիծը, իրագործման մեխանիզմը, բազմաբնույթ մարզային և համապետական ազդեցությունը թե՛ տուրիզմի, թե՛ սոցիալ-տնտեսական ոլորտի վրա, քննարկվել են գյուղացիների անշարժ գույքի ձեռքբերման տարբերակներ, սակայն չեն նշվել հստակ ժամկետներ, բուն առ ու վաճառքի գործընթացի շուրջ բանակցություններ և հստակ գնառաջարկներ, առավել ևս, վախի մթնոլորտ կամ սպառնալիքներ չեն եղել:
Պարոն Բաղդասարյանը հստակեցրեց, որ Հայաստանի Հանրապետության կառավարության 2018թ. մարտի 6-ի «Հայաստանի Հանրապետության Լոռու մարզում լեռնադահուկային կենտրոն ստեղծելու նպատակով հասարակության և պետության կարիքների համար օտարման ենթակա սեփականության նախնական ուսումնասիրության մասին» թիվ 291-Ն որոշումներով հավանություն է տվել Հայաստանի Հանրապետության Լոռու մարզում լեռնադահուկային կենտրոն ստեղծելու ներդրումային ծրագրին և «Մայմեխսկի ռեզորթ» փակ բաժնետիրական ընկերությանը (այսուհետ՝ ձեռք բերող), թույլատրվել է որոշման հավելվածում նշված կոորդինատներին համապատասխանող եզրագծի սահմաններում` 584 հեկտար, իրականացնել օտարման ենթակա սեփականության նախնական ուսումնասիրություն` կատարել չափագրումներ, նկարահանումներ և կազմել օտարման ենթակա սեփականության օբյեկտների նկարագրության արձանագրությունները:
Պարոն Բաղդասարյանը ափսոսանքով հավելեց, որ այն գերակա շահը, որ այսօր պետությունը պետք է ունենար ներդրումային ոլորտում հեռանկարային նախագծերի խթանման համար, ցավոք, չկա:
«Մայմեխ Սկի Ռեզորթ» ՓԲԸ հաղորդագրություն
