Մարդու իրավունքների եվրոպական դատարանը հինգշաբթի որոշում է կայացրել Դադայանն ընդդեմ Հայաստանի գործով:
Դատարանը միաձայն որոշել է, որ Մարդու իրավունքների և հիմնարար ազատությունների կոնվենցիայի 6-րդ հոդվածի 1-ին և 3-րդ կետերի (արդար դատաքննության և վկաների ներկա լինելու և քննելու իրավունք) խախտում է եղել:
Քրեական գործ էր հարուցվել հարստացված ուրանի Վրաստան մաքսանենգության հատկանիշով: Երկու մաքսանենգները դատապարտվել են Վրաստանում, իսկ Դադայանը՝ Հայաստանում, ըստ էության վրացական իշխանություններին տված վկայությունների հիման վրա:
Դատարանը մասնավորապես պարզել է, որ Դադայանի պաշտպանության իրավունքը զգալիորեն տուժել է, քանի որ հայկական դատարանը երբեք անձնապես չի լսել մաքսանենգներին: Վրաստանի իշխանությունները հրաժարվել են նրանց Հայաստան տեղափոխել, չնայած այն հանգամանքին, որ այդ վկաների հայտարարությունները եղել են միակ հիմքը, որի հիման վրա դատարանը կարող էր որոշում կայացնել արդյոք Դադայանը ներգրավվել է ռադիոակտիվ նյութերի վաճառքի մեջ, թե ոչ:
ՄԻԵԴ-ը վճռել է պարտավորեցնել Հայաստանին վճարել Գագիկ Դադայանին 2400 եվրո՝ ոչ նյութական վնասի համար և 1000 եվրո՝ դատական ծախսերի փոխհատուցման համար:
