«Բաց ռեժիմ տեղափոխվելը ազատություն չէ»,- ՀՀ գլխավոր դատախազության առաջ ի պաշտպանություն Շանթ Հարությունյանի, նրա արդարացման եւ ազատ արձակման նախաձեռնության ժամանակ հայտարարեց Շանթ Հարությունյանի որդի Շահեն Հարությունյանը:
Բողոքի ցույցը կազմակերպել է Նախաձեռնությունների ազգային կենտրոն (ՆԱԿ) հասարակական կազմակերպությունը:
Շահեն Հարությունյանի կարծիքով՝ 12 ժամ բանտում, 12 ժամ ազատության մեջ գտնվելը, շաբաթ կիրակի բանտում լինելն անգամ ֆիզիկական ազատություն չէ. «Մենք չենք պահանջում, որ Նիկոլ Փաշինյանը զանգի դատարան, ցուցումներ տա: Մենք ձգտում ենք արդարացման, եթե բարդ է ներկա իրավիճակում հասնել արդարացման, գոնե կարելի է քաղաքական հայտարարությամբ բանտից ազատել Շանթ Հարությունյանին, այլ ոչ թե դեմ տալ մի թուղթ, որ պարզապես քո դիմաց մի բան ենք շպրտում, դու վերցրու»:
Շահեն Հարությունյանը նաև տեղեկացրեց՝ շաբաթ օրը Շանթ Հարությունյանը ասուլիս կտա, բայց ժամը դեռ հստակեցված չէ:
Տաթև ՀԱՐՈՒԹՅՈՒՆՅԱՆ
