«Քրեական օրենսգրքում» փոփոխությունների նախագիծն է քննարկվում խորհրդարանում: ԱԺ փոխնախագահ Արփինե Հովհաննիսյանն ասաց, որ ուզում է այս թոհուբոհի մեջ հանկարծ չանտեսվեն ընտրողների իրավունքները:
Հիշեցնենք, որ կառավարության նախագծով քրեականացվում է ընտրակեղծարարության առանձին հանցագործությունների, ինչպես նաեւ խստացվում են ընտրակեղծարարության պատիժները:
Արփինե Հովհաննիսյանն ասաց, որ միջին ծանրության հանցագործությունները դարձնում են ծանր ու այդ համատեքստում նախագծին կողմ է, բայց ունի մտահոգություններ. «Այն, որ ընտրակաշառք ստանալը քրեորեն պատժելի է, վաղուց կա, դա նորմալ է: Կաշառքը առաջարկը կամ խոստումն ընդունելն է: Որեւէ մեկը չգիտի, թե ԱԱԾ-ն, ոստիկանությունը, քննչական մարմինը, մյուս իրավապահ մարմիններն ինչպես են մեկնաբանելու «խոստումն ընդունել» եզրույթը: Իմ կարծիքը, թե ինչ է խոստումն ընդունելը, Գեւորգ Կոստանյանինը, փոխնախարարի կարծիքը կարեւոր չէ, կարեւորն այն է, թե ինչքան հստակ է ձեւակերպված օրենքում իրավաբանորեն ու կիրառող մարմինն ինչ է հասկանալու դրա տակ, հասկանալու է այն, ինչ ե՞ս եմ հասկանում, թե՞ Արթուր Հովհաննիսյանը: Կաշառք ստանալը հստակ է, պահանջելն էլ կարող է հստակ լինել, կաշառք տալն էլ հստակ է, բայց խոստումը կամ առաջարկն ընդունելը ինչպե՞ս է դրսեւորվելու: Բացատրեք իրավաբանորեն, ես կողմ կքվեարկեմ»:
Արփինե Հովհաննիսյանն այլ խնդրահարույց դրույթների հետ կապված նույնպես իր նկատառումները ներկայացրեց: Նա ասաց, որ գրավոր առաջարկություններ կներկայացնի. «Ես կողմ եմ քրեականացման խստացման դրույթներին, բայց այս եւ մի քանի դրույթների առկայությունը ստվերում է նախագծի դրական կողմերը եւ նախագիծը դարձնում է պրոբլեմատիկ ՀՀ քաղաքացիների համար: Մենք ընտրակեղծարարների մասին չենք խոսում այս դեպքում»:
Հռիփսիմե ՋԵԲԵՋՅԱՆ
