Ամուլսարի ոսկու հանքավայրի շահագործման դեմ պայքարող բնապահպաններն այսօր իրազեկման միջոցառում իրականացրին՝ հանրությանը հիշեցնելով, որ հանքարդյունաբերությունը չի կարող ավելի գերակա համարվել մարդկանց առողջությունից եւ շրջակա միջավայրի պահպանությունից:
Ակտիվիստները կառավարության դիմաց պայթեցրին փուչիկներ, որոնց վրա գրություններ էին Ամուլսարի շահագործման «դրական միֆերի» մասին` «պատասխանատու հանքարդյունաբերություն», «միջազգային չափանիշներ», «տնտեսական աճ»:
https://www.facebook.com/aravot.am/videos/778212322349004/
Հիշեցնենք՝ հանքը շահագործող «Լիդիան Արմենիա» ընկերության դեմ քրեական գործ է հարուցվել՝ ոչ պատշաճ բնապահպանական փորձաքննություն կատարելու փաստի հիման վրա, վարչապետ Նիկոլ Փաշինյանն էլ օրերս հայտարարել է, որ սպասում են միջազգային փորձագետների գնահատականներին:
Բնապահպան Անի Խաչատրյանը լրագրողների հետ զրույցում նշեց՝ թեեւ հանքի միայն շինարարական աշխատանքներն են սկսվել, փոշու տարածումը զգալի է հատկապես Ջերմուկ առողջարանային քաղաքի բնակիչների համար. «Քանիցս «Լիդիան»-ի կողմից վնասվել են խմելու ջրի խողովակները: Խմելու ջրի որոշ աղբյուրներ չորացել են, այգիներ են հատվել»: Բնապահպանները մեջքին կապել էին թղթե թիթեռնիկներ՝ այդպես մատնանշելով, որ Ամուլսարի տարածքում կան բնաշխարհի՝ «Կարմիր գրքում» գրանցված ներկայացուցիչներ:
https://www.facebook.com/aravot.am/videos/322661315168779/
Անդրադառնալով տնտեսական զարգացման եւ ներդրումների, իսկ նախկինում՝ բնապահպանության նախարար Արծվիկ Մինասյանի դիտարկմանը, թե՝ Ամուլսարի բարձրության վրա դժվար թե թիթեռի բնակատեղի լինի, Անի Խաչատրյանն ասաց. «Երբ Արծվիկ Մինասյանը նախարար էր, ապօրինություններ է թույլ տվել: Նա «Լիդիան»-ի ծրագրերին թույլտվություններ է տվել: Նա մասնագետ չի ու չպետք է նման գնահատականներ տա»:
Հիշեցնենք՝ օրերս Մինասյանն ասուլիսում հայտարարել էր, որ իր պաշտոնավարման ժամանակ «Լիդիան»-ի՝ շրջակա միջավայրի ազդեցության փորձաքննությունների փաստաթղթերում խախտումներ չեն եղել:
Օրերս էլ Ամուլսարի շուրջ իրավիճակին արձագանքել էր «Լիդիան Արմենիան»՝ կառավարությանը մեղադրելով https://www.aravot.am/2018/09/01/978224/ անգործության համար:
Լուիզա ՍՈՒՔԻԱՍՅԱՆ
