Թե ապագան ինչ ցույց կտա, չեմ կարող ասել, բայց այսօրվա դրությամբ ռոումինգը չի կարող վերանալ: Սակայն բացառված չէ, որ ռոումինգի սակագները պարբերաբար կարող են քննարկվել: Այս մասին Aravot.am-ի հետ զրույցում ասաց «Ղարաբաղ Տելեկոմ» ՓԲԸ գլխավոր տնօրեն Կարեկին Օդաբաշյանը:
«Մեր հասարակությունը հաճախ է բարձրաձայնում այն հարցը, որ Արցախը Հայաստան է, և ռոումինգը պետք է վերանա: Բայց դա բացարձակապես անհնար է: Ուզենք, թե չուզենք, մենք երկու պետություններ ենք՝ առանձին պետական կառավարման համակարգերով: Բացի այդ, առկա է նաև տարածաշրջանային իրողություն, որը չենք կարող անտեսել: Այսօր Արցախը Հայաստանի պես չի կարող օգտվել տարածաշրջանային համագործակցության հնարավորություններից: Ուզում եմ հասարակությունը ընդունի նաև, որ ռոումինգը առկա է, որպեսզի «Ղարաբաղ Տելեկոմ»-ը կարողանա գործել համաշխարհային օրենքների ներքո՝ առանց դրանք խախտելու»,- պարզաբանել է Կ. Օդաբաշյանը:
Նշենք, որ «Ղարաբաղ Տելեկոմ»-ի և «ՎիվաՍել-ՄՏՍ»-ի միջև ձեռք է բերվել պայմանավորվածություն, որի արդյունքում վերանայվել է ռոումինգի սակագինը (այս տարվա սեպտեմբերի 1-ից այն նվազել է 15,5 տոկոսով): Այսպիսով՝ «ՎիվաՍել-ՄՏՍ»-ի բաժանորդները Արցախ այցելելիս, ելքային զանգեր կկատարեն 38 դրամ/րոպե սակագնով, նախկին 45 դրամ/րոպե սակագնի փոխարեն:
Նույնն է նաև «Ղարաբաղ Տելեկոմ»-ի բաժանորդների համար՝ Հայաստանում գտնվելու ժամանակ, սակայն «ՎիվաՍել-ՄՏՍ»-ի ցանցում գրանցվելու դեպքում:
Հայաստանյան մյուս բջջային օպերատորների բաժանորդների համար, ըստ նրանց պաշտոնական կայքերի, Արցախում ռոումինգի սակագինը դեռ շարունակում է մնալ 45 դրամ/րոպե:
Կ. Օդաբաշյանը նշեց, որ «Ղարաբաղ Տելեկոմ»-ը պատրաստ է հայաստանյան մյուս բջջային օպերատորների հետ ևս քննարկել և վերանայել ռոումինգի սակագները:
Դավիթ ԱԲԱՂՅԱՆ
