Խորհրդարանը կարող է լուծարվել անգործության դեպքում, սակայն այսօր, նման իրավիճակ չկա: Այդ մասին, այսօր խորհրդարանում լրագրողների հետ զրույցում ասաց ԱԺ ՀՀԿ խմբակցության պատգամավոր Սամվել Ֆարմանյանը:
«Քանի դեռ սահմանադրական փոփոխություններ կոչվածի գաղափարից զատ, միս ու արյուն ներկայացնող մեխանիզմ չկա, ես չեմ կարող կարծիք հայտնել: Խորհրդարանի ինքնալուծարման հետ կապված, ես կարծում եմ, որ դա ամենաճիշտ ճանապարհը չէ, նույնիսկ նախաձեռնողների տեսանկյունից, իրենց առջեւ դրված խնդիրների լուծման տեսանկյունից»,- ասաց Սամվել Ֆարմանյանը` հավելելով, որ սահմանադրական հիպոթետիկ փոփոխությունները, եթե չեն առնչվելու կառավարման համակարգի փոփոխությանը, ցանկացած կատարվող քայլ, որը նվազեցնելու է խորհրդարանի վարկը`վնասելու է պետությանն ու պետականությանը:
Սամվել Ֆարմանյանը կարծում է, որ խնդիրներն, այնուհանդերձ, պետք է լուծվեն քաղաքական ճանապարհներով: Խորհրդարանի անգործություն եւ երկրում քաղաքական ճգնաժամ ինքը չի տեսնում: Չի վիճարկում`ներկայիս խորհրդարանը չի արտացոլում հասարակական տրամադրությունները եւ հավելում է`եթե այդպես չլիներ, ապա խորհրդարանական մեծամասնությունը եւ գործադիր իշխանությունը կներկայացնեին նույն ուժը, ինչպես կառավարման համակարգն է ենթադրում:
Այլ մանրամասները`տեսանյութում
Լրագրողները հետաքրքրվեցին նաեւ անցումային արդարադատությունից: Սամվել Ֆարմանյանն ասաց`կարծիք հայտնել չի կարող, քանի դեռ հստակ տեսլականներ չկան:
Նելլի ԳՐԻԳՈՐՅԱՆ
