Պետական-իրավական եւ մարդու իրավունքների պաշտպանության հարցերի մշտական հանձնաժողովն իր հաջորդ նիստում կքննարկի ԱԺ «Ելք» խմբակցության պատգամավորներ Լենա Նազարյանի եւ Ալեն Սիմոնյանի հեղինակած նախագիծը`2008 թվականի մարտի 1-ի զոհերի հարազատներին փոխհատուցում տրամադրելու հարցը: Այս մասին այսօր հանձնաժողովի նիստում հայտարարեց հանձնաժողովի նախագահ Գեւորգ Կոստանյանը`հավելելով, որ ՀՀԿ-ն եւս կողմ է նախագծին եւ կողմ է քվեարկելու:
Հիշեցնենք, նման նախագիծ նախորդ գումարման խորհրդարանում ներկայացրել էր ընդդիմադիր պատգամավոր Նիկոլ Փաշինյանը: Ինչպես հետո պարզվեց, նախագիծը համաձայնեցված չէր ոչ ՀԱԿ ղեկավարության հետ, ոչ էլ խմբակցության անդամների: Նախագիծն այն ժամանակ հավանություն չստացավ:
Գեւորգ Կոստանյանն ասաց, որ այժմ շատ տեղին եւ ժամանակային առումով նաեւ հարմար են գտնում նման նախաձեռնությունը: Ավելին`ՀՀԿ-ն առաջարկներ ունի, որպեսզի նախագիծը տարածվի ոչ միայն մարտի 1-ի իրադարձությունների վրա, այլ առհասարակ, բռնությամբ կատարված բոլոր տեսակի հանցագործությունների`նաեւ 1999-ի հոկտեմբերի 27-ի, սահմաններում զոհվածների եւ այլն:
Ալեն Սիմոնյանը վերապահում ուներ. առաջարկեց առանձին նախագիծ ներկայացնել եւ չխառնել քաղաքական հանցանքը, սահմանում զոհված զինվորի դեպքի հետ:
ԱԺ փոխնախագահ Արփինե Հովհաննիսյանը հիշեցրեց միջազգային պրակտիկան եւ փաստաթղթերը որոնցով կարգավորվում են նման խնդիրները եւ պնդեց, որ նախագիծը լինի ամբողջական:
Մանրամասները`տեսանյութում
Նելլի ԳՐԻԳՈՐՅԱՆ
