ՈՒԵՖԱ-ի Ազգերի լիգայի հանդիպումներին այսօրվանից նախապատրաստությունն սկսած Հայաստանի ազգային հավաքականի անդամները առաջին մարզումից հետո լրագրողների հետ զրուցած ֆուտբոլիստները նշեցին, որ տրամադրված են մարտական, հավաքականում մթնոլորտը լավ է եւ անելու են ամեն բան հաջողության հասնելու համար:
Արթուր Սարկիսով, հարձակվող, «Ենիսեյ» (Ռուսաստան). « Ինքնազգացողությունս եւ մարզավիճակս լավ է, քանի որ Ռուսաստանի առաջնությունը մեկնարկել եւ ընթացքի մեջ է: «Լիխտենշտեյնի եւ Մակեդոնիայի հետ խաղերը հեշտ չեն լինի, բայց մենք կներդնենք առավելագույն ջանքեր: Ազգերի լիգայի եզրափակիչ փուլ անցնելու հնարավորություն բոլոր հավաքականներն էլ ունեն: Ֆուտբոլում ամեն բան էլ լինում է: Մենք նախկինում էլ դրան մոտ էինք, սակայն բախտներս մի փոքր չբերեց:
Հետեւություններ արել ենք եւ կանենք առավելագույնը: Դարպասապահ Դավիդ Յուրչենկոն, իհարկե, ուժեղ դարպասապահ է եւ կարող է շատ օգնել հավաքականին, բայց որոշում կայացնելու իրավունքն իրենն է»:
Արաս Օզբիլիս, կիսապաշտպան, «Վիլլեմ II» (Հոլանդիա). «Շատ ուրախ եմ, որ նորից այստեղ եմ: Իմ ակումբում երեք հանդիպման եմ մասնակցել ու խաղից խաղ լավացրել: Հավաքականում տրամադրությունը բարձր է: Բայց ժամանակ քիչ ունենք: Պիտի ամեն բան անենք, որպեսզի առաջին խաղում լավ արդյունք գրանցել: Հիմա ոչ մի հավաքական էլ թույլ չէ: Այլեւս այն ժամանակները չեն, որ փոքր երկիրը մեծ երկրին խոշոր հաշվով պարտվում էր»:
Աշոտ ՀԱԿՈԲՅԱՆ
