Նախագահ Արմեն Սարգսյանը պարեց, հումորներ արեց ու իր մանկության գաղտնիքը բացեց (Տեսանյութ)

Այսօր նախագահ Արմեն Սարգսյանն այցելել էր «Մխիթար Սեբաստացի» կրթահամալիր, որի հիմնադիրը՝ Աշոտ Բլեյանը նախագահի հետ զրուցեց հանրակրթության խնդիրների մասին: Նա պատմեց, թե ինչպես են իրենք կերտում քաղաքացի:

Նախագահն էլ խոսեց էլիտար դպրոցների մասին: Նրա խոսքով՝ «Հանճարեղ երեխեքը օպերայի կողքը չեն ծնվում, ծնվում են ցանկացած հեռավոր գյուղում ու պետք է նրանց ներգրավել»:

Աշոտ Բլեյանն ասաց, որ միշտ չէ ու այնպես էլ չէ, որ ֆիզիկայից հաջողություններ ունեցողները հիմնականում ֆիզմաթ դպրոցից են գալիս: Նա մանկավարժական նոր մոտեցումների մասին խոսեց, մեթոդի դպրոցների, թե ինչպես տարբեր առարկաների նկատմամբ դրական էմոցիա ձեւավորել՝ հետաքրքիր մեթոդներով:

Մասնաշենքերում շրջելիս նախագահը բակում նկատեց շրջանաձեւ նստած երիտասարդների, մոտեցավ, ինքն էլ նրանց հետ ծալապատիկ նստեց ու սկսեց զրուցել: Իսկ նախագահին նստել օգնեց երիտասարդ տղաներից մեկը: «Երջանիկ տղա ես»,- ասաց նախագահը՝ բացատրելով,, որ ոչ թե նրա համար, որ իրեն օգնեց, այլ՝ այդքան գեղեցիկ աղջիկների շրջապատում լինելն է համարում երջանկություն: Երիտասարդները պատմեցին իրենց «Լապտեր» նախաձեռնության մասին:

Արմեն Սարգսյանը կատակներ արեց երիտասարդների հետ, նաեւ լողավազանում լողազգեստով շրջող երեխաներից մեկից կատակով լողազգեստ խնդրեց՝ իր համար:

Կրթահամալիրին հարակից հողատարածքներում բահով, փոցխով աշխատում էին երեխաներ ու մեծահասակներ, նրանք բարեկարգում ու մաքրում էին տարածքը: Աշխատող կանանցից մեկը նախագահին ջերմորեն ողջունեց, պարզվեց՝ ղարաբաղցի է: Արմեն Սարգսյանը տեղեկացրեց, որ երեկ էր ինքը Արցախում, կինն արձագանքեց՝ «երնեկ քո աչքերին»: Նախագահն իրեն չկորցրեց ու պատասխանեց. «Է գայիր հետս: Երեկ տոնն էր Ղարաբաղի, տոնդ շնորհավոր»:

Ուշագրավ էր, որ կրթահամալիրի մարմարյա սրահ կոչվող հատվածում նախագահը սկսեց երեխաների հետ ուս ուսի պարել ու իր սրտե քեֆ անել: Ավելի ուշ կրթօջախի սաների հետ զրույցում նախագահը մի գաղտնիք բացեց՝ 8 տարի ստիպված է եղել դաշնամուրի գնալ, մայրն է այդպես ցանկացել, բայց տաղանդ չունի: Նա ասաց, որ չի սիրում, երբ իր նվագածը լսում են: Աշոտ Բլեյանը հարցրեց՝ 8 տարի՞ պահանջվեց, որ դա իմանաք, Արմեն Սարգսյանն էլ պատասխանեց, որ չի դժգոհում, շնորհակալ է մորը, որովհետեւ ինքը դաշնամուրի գնալու շնորհիվ երաժշտությանը մոտ է, սիրում է եւ գնահատում երաժշտությունը, ինչը նույնպես կարեւոր է:

Նա իր ելույթում ասաց, որ աշխարհի շատ դպրոցներում է եղել, բայց այսպիսի դպրոց չի տեսել իր կյանքում:

https://www.facebook.com/aravot.am/videos/314036292693550/?_rdc=1&_rdr

https://www.facebook.com/aravot.am/videos/295859877892528/?_rdc=1&_rdr

Հռիփսիմե ՋԵԲԵՋՅԱՆ