Առեւտրականները կառավարության մոտից հեռացան ձեռնունայն: Հիշեցնենք՝ այսօր առավոտից տարբեր տոնավաճառների առեւտրականներ՝ փոքր եւ միջին ձեռնարկատիրությամբ զբաղվողներ, ցույցի էին դուրս եկել կառավարության շենքի մոտ՝ պահանջելով նվազեցնել ներմուծվող ապրանքների մաքսատուրքերը:
Ցուցարարներին կառավարությունից ոչ ոք ընդառաջ չեկավ: Մի պահ տեղեկություն տարածվեց, որ հարցի վերաբերյալ կառավարությունում քննարկումներ են ընթանում եւ ավելի ուշ ցուցարարներին կմոտենան պաշտոնյաներ, որպեսզի տեղեկացնեն, թե ինչ լուծումներ են պատկերացնում, սակայն ցուցարարներն այդպես էլ մնացին սպասելով:
Նրանք այսօր դադարեցրին բողոքի ցույցը: Կառավարության շենքի մոտ հաջորդ ցույցը տեղի կունենա հինգշաբթի օրը:
Առեւտրականները սպառնացին հինգշաբթի օրը մարդաշատ ցույց կազմակերպել: Նրանք նաեւ կասկածի տակ դրեցին խոսակցությունները, թե կառավարությունում այդ հարցով քննարկումներ եղել են:
Նելլի ԳՐԻԳՈՐՅԱՆ
Հ. Գ. Առևտրականների բարձրաձայնած խնդրի մասին վարչապետին զեկուցվելու է այսօր, Aysor.am-ին ասել է վարչապետի մամուլի խոսնակ Արման Եղոյանը. «Շաբաթ օրը ՊԵԿ ղեկավարության հետ հանդիպում էր տեղի ունեցել, առևտրականները ներկայացրել են իրենց խնդիրները և ՊԵԿ-ն այսօր այդ խնդիրների մասին պետք է զեկուցի վարչապետին ու գտնեն լուծումներ»:
