Հարկային ոլորտում բարեփոխումների նպատակով մշակվել են առաջարկներ, որոնք շուտով վարչապետի ղեկավարությամբ քննարկումների արդյունքում կներառվեն հարկային բարեփոխումների փաթեթում: Այս մասին այսօր լրագրողների հետ հանդիպմանը հայտարարեց ՀՀ տնտեսական զարգացման եւ ներդրումների նախարար Արծվիկ Մինասյանը: Մասնավորապես, նրա խոսքով, առեւտրի եւ ծառայությունների ոլորտում նախատեսվում է օրենքով հստակեցնել տոնավաճառի սեփականատեր-աշխատող իրավահարաբերությունները. «Որեւէ տոնավաճառի կազմակերպիչ չպետք է մտածի, որ տարբեր պայմանավորվածություններ կարող է ունենալ ծառայություններ մատուցողների հետ»:
Արծվիկ Մինասյանն այնուհետեւ նշեց, որ գերիշխող դիրք ունեցող սուպերմարկետները մանրածախ շուկայում խաղի հստակ կանոններ պետք է ունենան. «Շաքարի շուկայում աշխատանք ենք տանում երկրորդ ձեռնարկություն ունենալու նպատակով (մոտ տասը տարի առաջ փակված գործարանը վերագործարկելու հարց է քննարկվում.-խմբ): Առհասարակ, եթե մի շուկայում տասը ներմուծող կա, ներմուծողին սահմանափակելը ճիշտ չէ, բայց եթե երկու սուբյեկտ շուկան բաժանել են իրար մեջ, իրականացնելու ենք հստակ տարանջատում՝ ներմուծող-արտադրողի եւ մանրամեծածախ առեւտրի սուբյեկտի միջեւ: Գնագոյացումը բոլորի համար հավասար պետք է լինի»:
Հարցին՝ «այսինքն, Սամվել Ալեքսանյանին պատկանող ընկերության շաքարավազը չի՞ կարող վաճառվել «Երեւան-սիթի»-ներում, Արծվիկ Մինասյանը պատասխանեց. «Ոչ՝ ներմուծողն իր կազմակերպությամբ չի կարող վաճառել»: Հավելենք, որ օրենսդրական նախաձեռնությամբ, որը նախատեսվում է այս տարի դնել հանրային քննարկման եւ ամբողջացնել, ներմուծողն իր ապրանքը, օրինակ՝ շաքարավազը, վաճառքի սուբյեկտներին պետք է վաճառի հավասար գնով:
https://www.facebook.com/aravot.am/videos/532658183813716/
Լուիզա ՍՈՒՔԻԱՍՅԱՆ
