Ինչպես տեղեկացրել էինք, այսօր առավոտից» կառավարության շենքի մոտ բողոքի ցույց էին անում տարբեր տոնավաճառների աշխատակիցներ՝ պահանջելով նվազեցնել ներմուծվող ապրանքների մաքսազերծման գները: Երկու ժամից ավելի տեւած բողոքի ցույցից հետո կառավարության ոչ մի պաշտոնյա ցուցարարներին չմոտեցավ:
Կարգ պահպանող ոստիկաններին ցուցարարները խնդրել էին փոխանցել, որ իրենք սպասում են որեւէ պաշտոնյայի հետ զրույցի: Ցուցարարները որոշեցին այս պահին դադարեցնել ցույցը եւ շարունակել բոյկոտը, այն է՝ ապրանքներ չներմուծել: Նրանք տեղեկացրին, որ բողոքի այդ ձեւը իրենք կիրառում են արդեն 10 օր:
Թե հետո բողոքի ինչ տարբերակներ կգործադրեն՝ դեռեւս հայտնի չէ, բայց այժմ ցուցարարները նեղացած եւ վրդովված հեռանում են:
Նելլի ԳՐԻԳՈՐՅԱՆ
Հ. Գ. Ավելի ուշ ցույցի կազմակերպիչներից Արմեն Ներսիսյանը տեղեկացրեց, որ «իրենց ընկերը կապի մեջ է փոխվարչապետի հետ» եւ տեղեկացել է, որ այս պահին կառավարությունում քննարկում է ընթանում իրենց հարցի վերաբերյալ: Ցուցարարները կսպասեն մինչեւ որեւէ տեղեկություն ստանան:
