Այսօր առավոտից կառավարության շենքի մոտ են հավաքվել մի խումբ առեւտրականներ: Նրանք պահանջում են, որ իջեցվեն ներմուծվող ապրանքների մաքսազերծման գները:
Հիշեցնենք՝ մաքսային սահմանն անցնելիս ծառայության արժեքը 1 կգ ապրանքի համար թանկացել է միջինը 2 դոլարով: Եթե նախկինում 1 կգ ապրանքի մաքսազերծումը եւ մինչեւ կարգո հասցնելը 70 ցենտ էր արժենում, հիմա 2 դոլար 70 ցենտ է: Այս խնդիրը խորհրդարանի վերջին արտահերթ նիստում կրկին բարձրաձայնեց «Ծառուկյան» խմբակցության պատգամավոր Սերգեյ Բագրատյանը:
Հիշեցնենք՝ առեւտրականները այս պահանջով փողոց էին դուրս եկել դեռ մեկ-մեկուկես տարի առաջ: Հիմնական բողոքավորները «Բարգավաճ Հայաստան» կուսակցության նախագահ Գագիկ Ծառուկյանի սեփականություն հանդիսացող «Առինջ մոլի» աշխատակիցներն են: Հընթացս նրանց միացան նաեւ այլ տոնավաճառների աշխատակիցներ: Խնդիրը սակայն այդպես էլ լուծում չստացավ:
Կառավարությունն իր քայլը մեկնաբանում է տեղական արտադրանքին զարկ տալու նկրտումներով: Առեւտրականները դեմ չեն կառավարության ցանկությանը, ավելին՝ իրենք էլ ունեն տարբերակներ այդ ամենում իրենց ներգրավվածության վերաբերյալ: Առաջարկների փաթեթ, ասում են, երկու ամիս առաջ ներկայացրել են Հայաստանի նոր իշխանությանն՝ ի դեմս վարչապետ Նիկոլ Փաշինյանի: Նրանից, սակայն, դեռեւս արձագանք չեն ստացել:
Այսօր հավաքվել են կառավարության շենքի մոտ՝ պահանջելու, որ վարչապետն իրենց ընդունի եւ համատեղ լուծումներ գտնեն խնդրին: Հետագա քայլերի ծրագիր դեռեւս չունեն, բայց խաղաղ հավաքները կանցկացնեն այնքան, մինչեւ կառավարությունից արձագանք ստանան: Ըստ դրա էլ կորոշեն իրենց հետագա քայլերը:
Այլ մանրամասներ՝ տեսանյութում:
Նելլի ԳՐԻԳՈՐՅԱՆ
