Հարգարժան պարոն վարչապետ, Ձեզ է դիմում ՀՀ արդարադատության նախարարության «Նուբարաշեն» քրեակատարողական հիմնարկի ցմահ դատապարտյալ Արմեն Տեր-Սահակյանը:
Մահապատիժը մեր երկրում արգելված է, բայց զուտ ձեւական: Դանդաղ տեմպերով այն շարունակում է իրականացվել: Ցմահ դատապարտյալները՝ անհույս, սպասում են մահվան: Հայաստանում երկար տարիներ օրենքները չեն գործում, այլ ստորադասվել են մաֆիայի կանոններին: Տիրում էին ավազակապետության կանոններ: Անձամբ ես կորցրել էի հավատս արդարության նկատմամբ:
Պարոն վարչապետ, Ձեր Թավշյա հեղափոխությունից հետո մենք հույսով ու հավատով ենք լցվել դեպի Չեր անձը, որ երկրում վերջապես արդարություն կհաստատվի: Ինձ դատապարտել են մահապատժի՝ քննիչների ուզած ցուցմունքը չտալու համար:
22 տարի բանտում անցկացնելուց հետո ես մեծ հույսով Ձեզանից ներում եմ խնդրում: Հուսով եմ, որ չեք մերժի իմ ներման խնդրանքը եւ չեք թողնի, որ բանտում մահանամ, ինչպես մեր ընկերներից շատերը: Իմ ընտանիքի բոլոր անդամները սրտատրոփ սպասում են Ձեր որոշմանը:
Հարգանքով՝ ցմահ դատապարտյալ
ԱՐՄԵՆ ՏԵՐ-ՍԱՀԱԿՅԱՆ
«Առավոտ»
31.08.2018
