Այսօր գյուղատնտեսության նախարար Արթուր Խաչատրյանը լրագրողների հետ հանդիպման ժամանակ անդրադարձավ ստվերային գյուղատնտեսությանը:
Կառավարության օգոստոսի 23-ի նիստին վարչապետն այս մասին ասել էր՝ «Նոր եմ իմանում, որ կա ստվերային գյուղատնտեսություն»: Վարչապետ Փաշինյանը հանձնարարել էր զբաղվել այս խնդրով:
Aravot.am-ը նախարարից հետաքրքրվեց՝ կա՞ն բացահայտումներ, արդյոք նման կեղծիքների գնո՞ւմ են խոշոր ֆերմերները, գյուղացիական մեծ տնտեսություններ ունեցող օլիգարխները:
Խաչատրյանը բացատրեց, թե ինչպես է առաջանում ստվերային գյուղատնտեսությունը. հողի մի քանի տեսակի հարկ կա, եւ հողի կատեգորիան չեն փոխում, հետեւաբար հարկը ցածր է լինում.«Գայթակղություն է առաջանում կատեգորիան չփոխել, չեմ կարող ասել ծավալն ինչքան է, քանի հեկտար այգի է եղել, որը փոխվել է, որը չի փոխվել, զուտ այն պարզ պատճառով, որ ստվեր է»: Ըստ նախարարի, այստեղ նաեւ ոռոգման ջրի խնդիր կա՝ տարբեր մշակաբույսեր ջրի տարբեր քանակի պահանջ ունեն. «Եվ այստեղ էլ կարող է գայթակղություն է առաջանում: Ո՞ւմ են է պատկանում, չեմ կարող ասել»:
Խաչատրյանն անդրադառնալով գյուղացիական տնտեսությունների կրած վնասներին, նշեց, որ մինչեւ օգոստոս ամիսն անհամեմատ ավելի լավ վիճակում էին, քան նախորդ տարի, ըստ հաշվարկների՝ ցրտահարություններից, կարկտահարություններից առաջացած վնասը կազմել է 6 միլիարդ դրամ, մինչդեռ նախորդ տարի 12 մլրդ է եղել:
Այս ցուցանիշները վարչապետին զեկուցելու հաջորդ օրը, նախարարի խոսքերով ասած՝ ճակատագրի հեգնանքով, Արարատյան դաշտավայրում կարկուտ եղավ:
Ինչ վերաբերում է գյուղատնտեսության ապահովագրմանը, նախարարն ասաց, որ պիլոտային ծրագիր են մշակում, որը ներդնելու են Արարատի, Արմավիրի եւ Շիրակի մարզերում, ապահովագրությունը վերաբերում է մի քանի մշակաբույսերին. «Բյուջեում նախատեսված է 10 միլիոն եվրոյի չափ գումար, որը կիսվում է դոնորների կողմից: Փորձնական ենք ընտրել երեք մարզերը: Ընտրված երկու ռիսկերն են կարկտահարությունը, ցրտահարությունը, եւ չորս մշակաբույսեր»:
Ըստ նախարարի, եկող տարվա մարտից այս ծրագիրը կսկսեն իրականացնել:
Մանրամասն՝ տեսանյութում
Նելլի ԲԱԲԱՅԱՆ
