Այսօր Նորքի զինված խմբի գործով դատավարության շուրջ «Մեդիա կենտրոնում» իրենց մտահոգությունները հայտնեցին փաստաբանները: Նրանք դժգոհում էին, որ հեղափոխություն է եղել, թվում էր, թե քաղաքական ենթատեքստ ունեցող գործը պետք է որ արագ ընթանար, բայց գործի քննությունն անընդհատ հետաձգվում է:
Փաստաբաններն ասացին, որ շուրջ 2 ամիս է՝ նիստ չի եղել, անընդհատ զանգով կամ այլ կերպ տեղեկացնում են, որ նիստը հետաձգվում է ու հիմնավոր պատճառաբանություն չկա:
Վահագն Սալնազարյանի պաշտպանի խոսքով՝ «դատական քննությունը հանիրավի ձգձգվում է՝ առանց լուրջ պատճառաբանությունների: Հունիսի 25-ից հետո ըստ էության գործով դատական նիստ տեղի չի ունեցել: Վահագն Սալնազարյանի հետ կապված խափանման միջոցը փոխելու հնարավորություն կար, հրավիրել ենք ԱԺ պատգամավորների, հարցի պատասխանը չունենք, ձգձգվում է»:
Արա Պողոսյանի եւ Գեւորգ Ջնդոյանի պաշտպան Թամարա Պողոսյանն ասաց. «Միտում ենք տեսնում այստեղ: Երկու շաբաթ է, կոնկրետ ես չեմ կարողանում նույնիսկ կապվել այդ դատավորի աշխատակազմի հետ, որեւէ հեռախոսազանգի չեն պատասխանում, պաշտպանական կողմը չի իրազեկվում՝ ինչ պատճառաբանությունով են հետաձգվում նիստերը»:
Գործով ամբաստանյալ Վլադիմիր Առաքելյանի պաշտպանն էլ ասաց, որ իր պաշտպանյալն ունի բազմաթիվ առողջական խնդիրներ. «Ես նոր եմ ներգրավել գործում: Շուրջ 2 ամիս է՝ խոչընդոտվում է իմ լիազորությունները, մուտքի ապահովում չունեմ ՔԿՀ: Ընտանիքի անդամները դիմել են իմ գրասենյակ, որ ստանձնեմ լիազորությունները, դատավորի որոշում չկա՝ ես ստանձնե՞լ եմ իմ լիազորությունները, որ կարողանամ մտնել ՔԿՀ: Վարույթ իրականացնող մարմինը միայն իրավասություն ունի դա որոշել՝ դատավոր Արմեն Բեկթաշյանը»:
Փաստաբանները դատավոր Բեկթաշյանի հարցով դիմելու են ԲԴԽ-ին, բայց ԲԴԽ անդամ է նաեւ ինքը՝ Բեկթաշյանը:
Փաստաբան Գիվի Հովհաննիսյանն ասաց, որ իրենց ճանապարհներով իմացել են, որ վերջին նիստը հետաձգվել է հիվանդության պատճառով. «Այնպիսի տպավորություն է, որ պարոն Բեկթաշանը չի ցանկանում այս գործով քննությունը շարունակել, կարող է ինքնավնասումով է զբաղվում, որ դատավարություն չիրականացվի: Մենք առողջություն ենք մաղթում պարոն Բեկթաշյանին ու որպեսզի նման գործելաոճը չշարունակվի, լավ կլինի, որ միջոցներ ձեռնարկվեն դատավորին փոխելու: Մենք այդ հարցն ենք բարձրացնում՝ դատավորին փոխեք»:
Նա ասաց, որ հարազատները ճանապարհ են փակում, որ նիստը լինի, այլ ճանապարհ չեն թողել: Գործին ուշադրություն չեն դարձնում. «Ես կոչ եմ անում հարազատներին այդ գործելաոճը շարունակել, այլ ճանապարհ չենք գտնում, փաստաբաններով անիմաստ թուղթ ենք սեւացնում՝ բողոքներ ներկայացնելով: 2015-ի նոյեմբերից անազատության մեջ են, գրեթե 2 տարի է դատավարություն է ընթանում՝ դեռ կեսն էլ չենք հասել»:
Գիվի Հովհաննիսյանը նշեց, որ քանի որ դատական նիստերը չեն լինում, չեն կարողանում միջնորդություն ներկայացնել իրենց պաշտպանյալների խափանման միջոց կալանքը փոխելու. «Նույնիսկ ինքնաբացարկի միջնորդություն չենք կարողանում ներկայացնել»:
Թամարա Պողոսյանն ասաց, որ իր երկու պաշտպանյալներն էլ առողջական խնդիրներ ունեն, Արա Պողոսյանը գտնվում է դատապարտյալների հիվանդանոցում. «Գեւորգ Ջնդոյանի մայրը ինձ ամեն հինգշաբթի զանգում է, ասում է՝ երաշխավորագիր ներկայացրած պատգամավորները պե՞տք է, որ ուրբաթ ներկայանան, մենք անորոշության մեջ ենք»:
Փաստաբաններն ասացին՝ հասկանալի է, որ իշխանությունը զանգով չի փորձում որոշում պարտադրել դատարաններին, բայց հակակշիռների ինստիտուտ չկա: Գիվի Հովհաննիսյանի խոսքով՝ «Նիկոլ Փաշինյանն ասաց, որ չի զանգելու դատավորներին, բայց ստացվում է, որ պետության միջոցներն են վատնվում, դատավորներին աշխատավարձ է տրվում՝ չաշխատելու համար: Կառավարությունը պետք է ուշադրություն դարձնի այս հարցին, ինչո՞ւ է աշխատավարձ տալիս դատավորներին»:
Հռիփսիմե ՋԵԲԵՋՅԱՆ
Լուսանկարը՝ «Մեդիա» կենտրոնի
